Прогнозлаштириш ва макроиқтисодий тадқиқотлар институти (PMTI) экспертлари Ўзбекистон ҳудудларида Иқтисодий фаоллик барометри (ИФБ) натижаларини эълон қилди.
ИФБ маълум бир даврда ҳудуддаги иқтисодий фаолликни баҳолайди. Фаолликни пасайишини бартараф этиш бўйича чоралар кўриш ҳамда ҳудудлар ўртасида рақобатни рағбатлантиради. ИФБ 12 та кўрсаткични 3 та компонентга бўлган (ишлаб чиқариш, тадбиркорлик, ташқи савдо фаоллиги) ҳолда ҳисобланади.
Таҳлил натижаларига кўра, 2022 йилнинг биринчи ярмида иқтисодий фаолликнинг юқори кўрсаткичлари Андижон, Жиззах, Самарқанд вилоятларида ҳамда Тошкент шаҳрида (ИФБ = 0,569-0,678) кузатилган.
Бунга Андижон ва Жиззах вилоятларида истеъмол товарларни ишлаб чиқаришда, товар ва хизматлар экспорти ҳамда импортида кузатилган жадал ўсиш ижобий таъсир этган. Ўз навбатида, бу вилоятларда ишлаб чиқариш ва ташқи савдо ҳам фаол бўлган.
Бунинг натижасида Андижон (12-ўриндан 1-ўринга) ва Жиззах (9-ўриндан 2-ўринга) вилоятлари ҳудудлар орасида ўз позицияларини яхшилашга эришишди.
Самарқанд вилоятининг ИФБ юқорилиги (3-ўрин) ушбу ҳудудда тадбиркорлик фаолияти (кичик бизнес субъектларининг ташкил этиш ва самарали фаолият юритиш қулайлиги) ва экспорт салоҳияти (озиқ-овқат маҳсулотлари, туризм хизматлари) ривожланганлиги натижасида кузатилди.
Ҳисобот даврида 6 та ҳудуд (Андижон, Жиззах, Навоий, Фарғона, Хоразм, Самарқанд вилоятлари) иқтисодий фаоллигини яхшилаган бўлиб, бунда тадбиркорлик иқтисодий ривожланишни юзага келтирувчи асосий омил ҳисобланади.
Аввалроқ Ўзбекистонда энг кўп улгуржи савдо амалга оширилган ҳудудлар маълум қилинган эди.
Изоҳ (0)