“Paxtakor” bosh murabbiyi Maksim Shatskix Superliga 17-turi doirasida “Navbahor”ga qarshi kechgan o‘yindan (1:1) keyin o‘z fikrlari bilan o‘rtoqlashdi.
O‘yin haqidaMenimcha, o‘yin muxlislarga yoqdi. Chempionlik uchun kurashayotgan ikkita kuchli jamoa to‘qnash keldi, shu bois bahs tomoshabob va keskin o‘tdi. Odatda bunday o‘yinlarda ko‘p golli vaziyatlar kutilmaydi, ammo bugun yaxshi o‘yin bo‘ldi. Tomoshabinlar stadionni to‘ldirdi va ular uyga yaxshi kayfiyatda ketdi deb o‘ylayman.
“Navbahor”ni qay darajada o‘rgangani borasida
Har bir raqibga tayyorgarlik ko‘ramiz, uning kuchli va kuchsiz tomonlarini o‘rganib chiqamiz. Shunga qarab taktika tuzamiz. “Navbahor”ning ko‘p o‘yinlarini ko‘rib chiqdik. Ular doim bir xil o‘ynaydi, bugun ham shunday bo‘ldi. Bizning darvozamiz oldida xavfli vaziyatlar sodir bo‘ldi va gol o‘tkazdik. Shunday ekan qiladigan ishlarimiz ko‘p.
Aziz Turg‘unboyevning almashtirilishi haqida
Turg‘unboyev biroz charchab qolganini sezdik. U namanganlik ekanini bilardim. U asosiy tarkibda tushishi shart edi. Ikkinchi bo‘limda uning o‘rniga boshqa futbolchi tushirishga va hujumni yanada jonlantirishga harakat qildik. Keyinroq sxemani o‘zgartirishga qaror qildik. Sababi bizda sxemalar juda ko‘p va yigitlar bundan xabardor.
Uch markaziy himoyachi bilan o‘ynagani haqida
Bunday taktikani hali ko‘p ko‘rasiz. Jahonda 75—80% klub uch markaziy himoyachi bilan o‘ynayapti. Zamonaviy futbolga moslashib boramiz. Taktik tarafdan syurprizlar mavsum davomida yetarlicha bo‘ladi.
Kubokda “Navbahor” to‘g‘ri kelib qolgani haqida
Rostini aytaman, futbolchilik paytimda bironta qur’ani ko‘rmaganman. Chempionlar Ligasi yoki kuboklarni ham. Menga qachon va qayerda o‘ynashning umuman farqi yo‘q. Namanganda stadion to‘lib tursa nima uchun yana bu yerda o‘ynamasligimiz kerak? Doim to‘lib toshgan stadionda o‘ynash yoqimli. Uydami yoki safardami farqi yo‘q.
Natija haqida
Biz ochko oldik? Fikrimcha, “Paxtakor” ikki ochko yo‘qotdi. Balki “Navbahor” bir ochko olgandir, buni bilmayman.
Futbolchilarga yetishmagan jihat borasida
Nima yetishmayapti? Individual mahorat. Futbolchilarga gol urishni o‘rgatib bo‘lmaydi. Bunda individual mahorat kerak. Futbolchini ochilishga, zonani kengaytirish yoki toraytirishga, raqibdan to‘pni olib qo‘yishni o‘rgatish mumkin. Hozir miya va qarorni qabul qilish tezligi futbolda eng oliy o‘rinda. Zamonaviy futbol shunga qarab ketmoqda. Ulardan biri bo‘lmasa jiddiy natijaga erishish juda qiyin.
Akasi Oleg Shatskix haqida
Oleg hozir oilasi bilan Moskva viloyatida yashamoqda. Sportga aloqador emas. Boshqa ishlar bilan band. Asosiysi unda barchasi yaxshi. Bugun o‘yindan oldin 30 yil avval Namanganga aynan “Navbahor” — “Paxtakor” uchrashuviga kelganimni esladim. O‘shanda akamga qarshi “Paxtakor” safida rahmatli Nikolay Shirshov personal o‘ynagandi. Standart vaziyatdan keyin akam boshi bilan gol urgandi va “Navbahor” 1:0 hisobida yutgandi.
Maksim Shatskix, “Paxtakor” bosh murabbiyi
Izoh (0)