«Пахтакор» бош мураббийи Максим Шацких Суперлига 17-тури доирасида «Навбаҳор»га қарши кечган ўйиндан (1:1) кейин ўз фикрлари билан ўртоқлашди.
Ўйин ҳақидаМенимча, ўйин мухлисларга ёқди. Чемпионлик учун курашаётган иккита кучли жамоа тўқнаш келди, шу боис баҳс томошабоб ва кескин ўтди. Одатда бундай ўйинларда кўп голли вазиятлар кутилмайди, аммо бугун яхши ўйин бўлди. Томошабинлар стадионни тўлдирди ва улар уйга яхши кайфиятда кетди деб ўйлайман.
«Навбаҳор»ни қай даражада ўргангани борасида
Ҳар бир рақибга тайёргарлик кўрамиз, унинг кучли ва кучсиз томонларини ўрганиб чиқамиз. Шунга қараб тактика тузамиз. «Навбаҳор»нинг кўп ўйинларини кўриб чиқдик. Улар доим бир хил ўйнайди, бугун ҳам шундай бўлди. Бизнинг дарвозамиз олдида хавфли вазиятлар содир бўлди ва гол ўтказдик. Шундай экан қиладиган ишларимиз кўп.
Азиз Турғунбоевнинг алмаштирилиши ҳақида
Турғунбоев бироз чарчаб қолганини сездик. У наманганлик эканини билардим. У асосий таркибда тушиши шарт эди. Иккинчи бўлимда унинг ўрнига бошқа футболчи туширишга ва ҳужумни янада жонлантиришга ҳаракат қилдик. Кейинроқ схемани ўзгартиришга қарор қилдик. Сабаби бизда схемалар жуда кўп ва йигитлар бундан хабардор.
Уч марказий ҳимоячи билан ўйнагани ҳақида
Бундай тактикани ҳали кўп кўрасиз. Жаҳонда 75—80% клуб уч марказий ҳимоячи билан ўйнаяпти. Замонавий футболга мослашиб борамиз. Тактик тарафдан сюрпризлар мавсум давомида етарлича бўлади.
Кубокда «Навбаҳор» тўғри келиб қолгани ҳақида
Ростини айтаман, футболчилик пайтимда биронта қуръани кўрмаганман. Чемпионлар Лигаси ёки кубокларни ҳам. Менга қачон ва қаерда ўйнашнинг умуман фарқи йўқ. Наманганда стадион тўлиб турса нима учун яна бу ерда ўйнамаслигимиз керак? Доим тўлиб тошган стадионда ўйнаш ёқимли. Уйдами ёки сафардами фарқи йўқ.
Натижа ҳақида
Биз очко олдик? Фикримча, «Пахтакор» икки очко йўқотди. Балки «Навбаҳор» бир очко олгандир, буни билмайман.
Футболчиларга етишмаган жиҳат борасида
Нима етишмаяпти? Индивидуал маҳорат. Футболчиларга гол уришни ўргатиб бўлмайди. Бунда индивидуал маҳорат керак. Футболчини очилишга, зонани кенгайтириш ёки торайтиришга, рақибдан тўпни олиб қўйишни ўргатиш мумкин. Ҳозир мия ва қарорни қабул қилиш тезлиги футболда энг олий ўринда. Замонавий футбол шунга қараб кетмоқда. Улардан бири бўлмаса жиддий натижага эришиш жуда қийин.
Акаси Олег Шацких ҳақида
Олег ҳозир оиласи билан Москва вилоятида яшамоқда. Спортга алоқадор эмас. Бошқа ишлар билан банд. Асосийси унда барчаси яхши. Бугун ўйиндан олдин 30 йил аввал Наманганга айнан «Навбаҳор» — «Пахтакор» учрашувига келганимни эсладим. Ўшанда акамга қарши «Пахтакор» сафида раҳматли Николай Ширшов персонал ўйнаганди. Стандарт вазиятдан кейин акам боши билан гол урганди ва «Навбаҳор» 1:0 ҳисобида ютганди.
Максим Шацких, «Пахтакор» бош мураббийи
Изоҳ (0)