Chexiya parlamenti deputatlar palatasi Shvetsiya va Finlyandiyaning NATOga qo‘shilishini qo‘llab-quvvatladi. Bu haqda parlament matbuot xizmati xabar berdi.
“Ovoz berishda qatnashgan 151 deputatdan 135 nafari Shvetsiyaning Shimoliy Atlantika alyansiga qabul qilinishi yoqladi, to‘rt nafari qarshi chiqdi. Ovoz berishda qatnashgan 152 nafar deputatdan 134 nafari NATOning Finlyandiya hisobiga kengayishini qo‘llab-quvvatladi, to‘rt nafari qarshi”, — deyiladi bayonotda.
Avvalroq Chexiya parlamenti Senati (yuqori palatasi) Xelsinki va Stokgolmning Shimoliy Atlantika alyansiga qo‘shilishini ma’qullagan.
18-may kuni Finlyandiya va Shvetsiya Ukrainadagi jangovar harakatlar avj olgan bir paytda NATOga qo‘shilish uchun ariza bergan. Turkiya Xelsinki va Stokgolmni mamlakatda taqiqlangan Kurdiston Ishchilar partiyasi bilan hamkorlikda ayblab, ularning alyansga qo‘shilishga bir muddat to‘sqinlik qildi.
Shvetsiya va Finlyandiya NATO blokiga qo‘shilishi uchun alyansga a’zo bo‘lgan 30 ta mamlakatning barchasi tegishli bitimni ratifikatsiya qilishi kerak. Hozirga qadar tegishli protokollar AQSH, Polsha, Estoniya, Islandiya, Kanada va yana bir qator davlatlar tomonidan ratifikatsiya qilingan.
Izoh (0)