Liviya poytaxti Tripolida qurolli guruhlar o‘rtasidagi to‘qnashuvlar oqibatida kamida 23 kishi halok bo‘ldi, 140 kishi yaralandi, deb xabar bermoqda LANA davlat axborot agentligi Sog‘liqni saqlash vazirligiga tayanib.
Oxirgi ma’lumotlarga ko‘ra, 83 nafar jabrlanuvchiga birinchi tibbiy yordam ko‘rsatilib, ular uyiga yuborilgan.
Avvalroq 12 kishi halok bo‘lgani va 87 kishi yaralangani haqida xabar berilgandi. Ular orasida qancha jangari va tinch aholi borligi noma’lum.
Tripolida to‘qnashuvlar 27-avgustga o‘tar kechasi boshlangan, shaharda portlashlar va otishma ovozlari eshitilgan. Keyinroq janglar poytaxtning g‘arbida joylashgan Janzur shahri hududiga ko‘chgan.
To‘qnashuvlarda ikki qarama-qarshi qurolli guruh ishtirok etmoqda. Birinchi guruh Liviya Milliy birlik hukumatining (GNU) amaldagi rahbari Abdulhamid Dbeybu tarafdorlaridan iborat — Dbeybu saylovgacha hokimiyatni topshirishdan bosh tortmoqda. Ikkinchi guruh a’zolari parlament tomonidan tayinlangan bosh vazir Fathi Bashagani qo‘llab-quvvatlamoqda.
Siyosiy beqarorlik Liviyada 2011-yilda Muammar Qaddafiy hokimiyatdan ag‘darilib, o‘ldirilganidan buyon kuzatilmoqda. Mamlakatda yagona boshqaruv organini shakllantirishga erishilmadi, oqibatda turli guruhlar orasida qurolli nizo, keyinchalik esa xalqaro tan olingan muvaqqat hukumat va general Xalif Xaftar rahbarligidagi Liviya milliy armiyasi o‘rtasida fuqarolar urushi kelib chiqdi.
Izoh (0)