Pentagon Ukrainaga qurol yetkazib berish uchun dengiz transportidan foydalanishni kengaytirdi. Bu haqda AQSH mudofaa vazirligi vakillariga tayanib, Washington Post gazetasi yozmoqda.
“Ularni gaubitsalar bilan ta’minlay boshlaganimizdan so‘ng, bizga ko‘proq o‘q-dorilar kerakligini tushundik. Shundan kelib chiqib oldindan rejalashtirish va qo‘llab-quvvatlovni yuborish uchun dengiz transportidan ko‘proq foydalanishimiz mumkin bo‘lmoqda”, — dedi AQSH transport qo‘mondonligining operatsiyalar bo‘yicha direktori o‘rinbosari Stiven Putxoff.
AQSH harbiylari ta’minot yo‘nalishlari haqida batafsil ma’lumot berishdan bosh tortdi, ammo ularning izohlashicha, qurollarning bir qismi to‘g‘ridan to‘g‘ri jang maydonlariga jo‘natilmoqda, ikkinchi qismi esa Yevropa mamlakatlaridagi Amerika zaxiralarini to‘ldirish uchun ketadi va u yerdan Ukrainaga yuboriladi.
Ukrainada urush boshlanganidan beri Jo Bayden ma’muriyati Kiyevga umumiy qiymati 12,9 milliard dollarlik harbiy yordam ko‘rsatgan. 24-avgust kuni Ukrainaning Mustaqillik kuni munosabati bilan AQSH prezidenti 2,98 milliard dollarlik eng yirik harbiy yordam paketi ajratilishini e’lon qildi. Pentagon Ukrainaga 1400 dan ortiq Stinger zenit raketalari, 8500 tankga qarshi Javelin raketalari, 700 Switchblade uchuvchisiz uchar apparatlar va 142 ta gaubitsa artilleriyasi hamda ular uchun 900 000 dan ortiq o‘q yetkazib bergan.
Izoh (0)