Пентагон Украинага қурол етказиб бериш учун денгиз транспортидан фойдаланишни кенгайтирди. Бу ҳақда АҚШ мудофаа вазирлиги вакилларига таяниб, Washington Post газетаси ёзмоқда.
«Уларни гаубицалар билан таъминлай бошлаганимиздан сўнг, бизга кўпроқ ўқ-дорилар кераклигини тушундик. Шундан келиб чиқиб олдиндан режалаштириш ва қўллаб-қувватловни юбориш учун денгиз транспортидан кўпроқ фойдаланишимиз мумкин бўлмоқда», — деди АҚШ транспорт қўмондонлигининг операциялар бўйича директори ўринбосари Стивен Путхофф.
АҚШ ҳарбийлари таъминот йўналишлари ҳақида батафсил маълумот беришдан бош тортди, аммо уларнинг изоҳлашича, қуролларнинг бир қисми тўғридан-тўғри жанг майдонларига жўнатилмоқда, иккинчи қисми эса Европа мамлакатларидаги Америка захираларини тўлдириш учун кетади ва у ердан Украинага юборилади.
Украинада уруш бошланганидан бери Жо Байден маъмурияти Киевга умумий қиймати 12,9 миллиард долларлик ҳарбий ёрдам кўрсатган. 24 август куни Украинанинг Мустақиллик куни муносабати билан АҚШ президенти 2,98 миллиард долларлик энг йирик ҳарбий ёрдам пакети ажратилишини эълон қилди. Пентагон Украинага 1400 дан ортиқ Stinger зенит ракеталари, 8500 танкга қарши Javelin ракеталари, 700 Switchblade учувчисиз учар аппаратлар ва 142 та гаубица артиллерияси ҳамда улар учун 900 000 дан ортиқ ўқ етказиб берган.
Изоҳ (0)