AQSHning Florida shtati, Pensakola shahrida talaba qiz yashin urishidan keyin tirik qoldi. Bu haqda Daily Mail xabar bermoqda.
18 yoshli Emma Eggler o‘qishning ilk kunida G‘arbiy Florida universitetiga ketayotgan payt, kutilmaganda uni yashin urgan. Yashin qizning ko‘ksiga teggan, oqibatda qiz yerga yiqilgan.
Zarba shunchalik kuchli bo‘lganidan qizning soati portlab, egnidagi sviteri yonib ketgan, paypog‘i va etigida teshiklar paydo bo‘lgan. Voqeadan keyin talaba bir muddat yura olmagan.
Egglerga yaqin atrofdagi universitet xodimlari va talabalar yordamga kelgan. Talaba kasalxonaga yotqizilgan. Shifokorlarning ta’kidlashicha, qizning tirik qolishi juda omadli hodisa. Yashin uning tanasi chap tomonini va oyoqlarini urgan.
“Men hech narsani his qilmadim, ko‘zimni ochganimda yerda yotgandim. Shifokorlar menga lotereya chiptasi sotib olishni maslahat berdi, chunki men juda omadli ekanman”, — deydi Eggler.
Bir kun o‘tib talaba kasalxonadan chiqarildi. Bu vaqtga kelib, unda oyoqlarning sezgirligi va harakat qobiliyati tiklandi. Talaba keyingi hafta o‘qishga qaytishni rejalashtirmoqda.
Izoh (0)