Ўзбекистонда бир ой ичида бодринг нархи икки бараварга ошди

Охирги ой давомида Ўзбекистонда силлиқ калта бодрингнинг улгуржи нархлари динамикасида барқарор ўсиш тенденцияси кузатилди, нархлар 2,3 баробар ошди. Бу ҳақда EastFruit хабар бермоқда.

Бундан ташқари, жорий улгуржи нархлар ўтган йилги даражадан 1,8 баравар юқори бўлмоқда.

Жорий йилнинг ёз бошидан Ўзбекистонда силлиқ калта бодрингнинг минимал улгуржи нархлари 2022 йил 22 июлда бир килограмм учун 2 500 сўм даражасида қайд этилган. 

Ўртача улгуржи нархи 3 000 сўмни ташкил этган ва шундан бери барқарор ўсиш тенденцияси шаклланди. 

2022 йил 22 июлдан 26 августгача бўлган даврда ушбу маҳсулотларнинг ўртача улгуржи нархлари бир килограмм учун 3 000 сўмдан 7000 сўмгача ошди. Бир ой ичида 2,3 баробар.

Эътиборлиси, ўтган йилнинг 22 июлида силлиқ калта бодрингнинг ўртача улгуржи нархи ҳам 3 000 сўм даражасида бўлган ва 2021 йил 22 июлдан 26 августгача бўлган даврда ўртача улгуржи нархлар 4 000 сўмгача ўсган. Бироқ бу йилги ўсиш суръати ўтган йилги кўрсаткичдан анча баландароқ бўлди.

Шундай қилиб, 2022 йил 26 август ҳолатига кўра, ушбу маҳсулотларнинг ўртача улгуржи нархи ўтган йилнинг шу санасида қайд этилган даражадан 1,8 баравар юқори.

Таққослаш учун, қўшни Тожикистонда ушбу маҳсулотларнинг ўртача улгуржи нархлари Ўзбекистонникидан 2 баробар, Польшада эса 1,5 баробар паст.