Qashqadaryo viloyat IIB boshlig‘i Shuhrat Sotvoldiyev qabulida bo‘lib, 53 yildan beri nogiron singlisini parvarish qilib kelayotganini aytgan ayolga ko‘mak berdi. Bu haqda “Daryo”ga viloyat IIB axborot xizmati rahbari Javlon Baxtiyev xabar berdi.
Ma’lum bo‘lishicha, Shuhrat Sotvoldiyev qabulida bo‘lgan ayol 55 yoshli singlisi va 92 yoshli onasi uchun yumshoq mebel olib berilishida yordam so‘ragan.
“Yashab turgan mahallamiz viloyat IIB boshlig‘i sektori hududiga kirgani uchun yaxshi niyatda IIB boshlig‘i qabuliga bordim. Qabulda bo‘lib, Shuhrat Sotvoldiyevga qaramog‘imda ikki yoshida nogiron bo‘lib qolgan 55 yoshli singlim va besh yildan beri to‘shakka mixlanib qolgan 92 yoshli onam borligini aytib, ularga yumshoq mebel olib berilishida ko‘mak so‘radim. Baraka topsin tezda ishga kirishib, uyimizga onam va singlim uchun yumshoq mebel, oilamiz uchun oziq-ovqat mahsulotlari olib kelishdi. Yanayam quvonarlisi 55 yoshli singlim uchun nogironlik aravachasi ham olib kelishdi. Shunday rahbarlarimiz ko‘payaversin”, — deydi murojaatchi Rajabgul Berdiyorova.
Boshqarma axborot xizmati rahbari Javlon Baxtiyevning qo‘shimcha qilishicha, bunday g‘amxo‘rlikdan sevingan 92 yoshli Xadicha ona Haydarova davlat rahbari, Ichki ishlar vazirligi va viloyat ichki ishlar boshqarmasi rahbariyatiga o‘z minnatdorchiligini izhor qilib, duoga qo‘l ochgan.
Izoh (0)