Тошкент метросининг «Тинчлик» бекати кириш йўлагида ҳам сув тошди. Бу ҳақда Veolia Energy Tashkent матбуот хизмати хабар берди.
Маълум қилинишича, 2022—2023 йилларда иситиш мавсумига сифатли тайёргарлик кўриш мақсадида жорий йил 23 август куни 1-ИМ қозонхонасининг амал қилиш ҳудудида иссиқлик қувурларининг механик чидамлилиги ва зичлиги (юқори босимда) синовдан ўтказилди.
Олдиндан келишилган жадвал асосида ўтказилган синов жараёнида 3-ИМга уланган «Тинчлик» метро бекати яқинидаги иссиқлик тармоғида авария содир бўлди. Оқибатда метрога тушиш йўлагида девордан иссиқ сув тошиб чиқиши кузатилди.
Veolia Energy Tashkent МЧЖ ХК Олмазор туман бошқармаси ходимлари томонидан махсус техникалар ёрдамида авария ҳолати юзага келган метронинг кириш йўлагида сув тошиши тўхтатилди.
Хабарда айтилишича, ҳозирда аварияни зудлик билан бартараф этиш чоралари кўрилмоқда.
Эслатиб ўтамиз, 23 август куни «Буюк ипак йўли» метро бекатининг юқори қисмидан ўтган иссиқлик қувурларига синов тариқасида сув юборилиши оқибатида диаметри 400 лик бўлган қувур ишдан чиқиб, бекатга сув сизиб ўтганди.
Маълумот учун, Вазирлар Маҳкамасининг тегишли қарорига мувофиқ, Veolia Energy Tashkent компанияси 1 июлдан бошлаб илгари «Тошиссиққуввати» бошқарувида бўлган барча фаолият турларини амалга ошириб келмоқда.
Изоҳ (0)