Qashqadaryo viloyati va Toshkent shahrida yer maydonlarini olib berishni va’da qilgan shaxslar ushlandi. Bu haqda Iqtisodiy jinoyatlarga qarshi kurashish departamenti axborot xizmati xabar qildi.
Ma’lum qilinishicha, Bosh prokuratura huzuridagi departament hamda IIVning Qashqadaryo viloyati boshqarmalari tomonidan tadbirkorlik subyektlarining huquqlarini himoya qilish yuzasidan tezkor tadbir o‘tkazilgan. Unda “K-K.” MCHJ rahbari U.M. va boshqalar “F.B.” MCHJga qarashli 3 gektar yer maydonini tanishlari orqali hokimiyat zaxirasiga qaytarib, keyinchalik 10 nafar fuqaroga 30 sotixdan dehqon xo‘jaligi uchun olib berish evaziga fuqaro J.A.dan 15 ming dollarni olgan vaqtida ashyoviy dalillar bilan ushlangan.
Departament hamda DXXning Toshkent shahri boshqarmalari tomonidan o‘tkazilgan tezkor tadbirda esa fuqaro X.A. fuqaro A.ning ishonchiga kirib, unga yuqori lavozimda ishlovchi tanishlari yordamida Xorazm viloyati Gurlan tumani Olg‘a qishlog‘ida bo‘sh turgan 1,17 gektar yer maydonini onlayn auksion orqali olib berish evaziga 22 500 dollarni qo‘lga kiritib, yana 8000 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)