Қашқадарё вилояти ва Тошкент шаҳрида ер майдонларини олиб беришни ваъда қилган шахслар ушланди. Бу ҳақда Иқтисодий жиноятларга қарши курашиш департаменти ахборот хизмати хабар қилди.
Маълум қилинишича, Бош прокуратура ҳузуридаги департамент ҳамда ИИВнинг Қашқадарё вилояти бошқармалари томонидан тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган. Унда «К-К.» МЧЖ раҳбари У.М. ва бошқалар «Ф.Б.» МЧЖга қарашли 3 гектар ер майдонини танишлари орқали ҳокимият захирасига қайтариб, кейинчалик 10 нафар фуқарога 30 сотихдан деҳқон хўжалиги учун олиб бериш эвазига фуқаро Ж.А.дан 15 минг долларни олган вақтида ашёвий далиллар билан ушланган.
Департамент ҳамда ДХХнинг Тошкент шаҳри бошқармалари томонидан ўтказилган тезкор тадбирда эса фуқаро Х.А. фуқаро А.нинг ишончига кириб, унга юқори лавозимда ишловчи танишлари ёрдамида Хоразм вилояти Гурлан тумани Олға қишлоғида бўш турган 1,17 гектар ер майдонини онлайн аукцион орқали олиб бериш эвазига 22 500 долларни қўлга киритиб, яна 8000 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)