AQSH Markaziy Osiyo mamlakatlari iqtisodiyotini tiklash bo‘yicha tashabbuslarni qo‘llab-quvvatlaydi

O‘zbekiston elchisi Javlon Vahobov AQSH Davlat kotibining Janubiy va Markaziy Osiyo bo‘yicha yordamchisi Donald Lu bilan uchrashdi, deb xabar bermoqda “Dunyo” axborot agentligi.

Qayd etilishicha, muloqot davomida O‘zbekiston—Amerika hamkorligiga oid qator dolzarb masalalar, avval erishilgan kelishuvlarni amalga oshirish va bo‘lajak qo‘shma tadbirlarning jadvali muhokama qilingan. Tomonlar, shuningdek, siyosiy, diplomatik, savdo-iqtisodiy, sarmoyaviy sohalarda hamda mintaqaviy hamkorlik doirasidagi hamkorlikni chuqurlashtirishga alohida e’tibor qaratgan. Kadrlar salohiyatini rivojlantirish bo‘yicha qo‘shma dastur va tashabbuslarni kengaytirish imkoniyatlari ham ko‘rib chiqilgan.

Amerika vakili Shavkat Mirziyoyevning tashqi siyosiy faoliyatini yuqori baholagan. Donald Lu AQSHning iqtisodiy o‘zaro bog‘liqlikni kengaytirish, oziq-ovqat xavfsizligini mustahkamlash va Markaziy Osiyo mamlakatlari iqtisodiyotini tiklash bo‘yicha tashabbuslarini har tomonlama qo‘llab-quvvatlashini yana bir bor ta’kidlagan.

Amerikalik diplomat joriy yil 20—23-avgust kunlari Kongressdagi “O‘zbekiston bo‘yicha kokus” hamraisi, Missisipi shtatidan respublikachi kongressmen Trent Kelli boshchiligidagi AQSH Kongressi delegatsiyasining Toshkentga tashrifiga to‘xtalgan. Uning so‘zlariga ko‘ra, 2017-yildan buyon AQSH Kongressi a’zolarining O‘zbekistonga yettinchi safari bo‘lgan amerikalik qonunchilarning ushbu tashrifi ikki davlat o‘rtasidagi parlamentlararo hamkorlikning yuqori o‘suvchanligidan dalolat beradi.

Tomonlar O‘zbekiston va AQSH infratuzilma, energetika, transport, atrof-muhitni muhofaza qilish va iqlim o‘zgarishiga qarshi kurashish sohalarida aniq natijalarga erishish uchun C5+1 formati doirasidagi hamkorlikni davom ettirish tarafdori ekanini ta’kidlagan.

Uchrashuv yakunida tomonlar ikki tomonlama va mintaqaviy sheriklik sohasidagi hamkorlikda erishilgan muvaffaqiyatlarni qayd etgan. Shuningdek, bir-birining manfaatlarini hisobga olish tamoyillari asosida konstruktiv muloqotni faol rivojlantirishga tayyor ekanini bildirgan.