“Qizimning Azamat Ahrorovga turmushga chiqmoqchi bo‘lgani piar emasdi”. Shahzoda Muhammedovaning onasi qizi u bilan gaplashmay qo‘yishiga sabab bo‘lgan voqea haqida (video)

Aktrisa Gulmira Muhammedova “Sevimli” telekanalining “Mashhurlar” ko‘rsatuviga bergan intervyusida san’atga nima sababdan qaytgani, kino olamida uni nima qoniqtirmasligi, qizining tarbiyasida qattiq turgani, uni tanqid qilgani, Azamat Ahrorov Shahzoda Muhammedovaning qo‘lini so‘ragani, qizi bilan bu masalada kelisholmay bir muddat gaplashmagani, kuyovi qiziga puli uchun uylangani haqidagi mish-mishlarga javobi, vaqti kelib Shahzoda Muhammedova san’atni tark etishini aytsa, bunga munosabati haqida gapirdi.

Gulmira Muhammedova nima sababdan san’atga qaytgani haqida

“Men 15 yildan buyon kino sohasida ishlayman, prodyuserlik sohasida ham faoliyat yuritib, bir nechta filmlarda va kliplarda epizodik rollarda ishtirok etganman. Hozirgi kunda esa bosh rollarni ham ijro etyapman. Ijodimda pandemiya davrida, qizimni turmushga bergan vaqtimda ikki yil tanaffus qildim. Qizimni Moskvaga turmushga berganimdan keyin men kino sohasidagi faoliyatimga qaytmayman deb o‘ylagandim. Tadbirkorlik ishlarimni hammasini boshidan boshlayotgan edim. Bu peshonaga yozilgan ekan, to‘g‘risini aytsam, bu narsa mening tushimda ayon bo‘ldi.

Tushimda sen san’atning odamisan, deb uyg‘otishar edi, nimaga bunaqa bo‘lyapti, deb hayron bo‘lardim. Bu tushimni qayta-qayta ko‘raverardim, lekin men bunga bo‘yin egmasdim va inkor etardim. Endi bo‘ldi, kech bo‘ldi, davr o‘tdi, 50 yoshga kirdik deganman, bu sohani o‘ylamaganman, qaytib kirish niyatim ham bo‘lmagan. Biroq peshonaga yozilganidan hech kim qochib qutulmas ekan. Agar siz san’atga kerak bo‘lsangiz, san’at sizni chaqirib olar ekan”, — deydi aktrisa.

Aktrisani kino olamida nima qoniqtirmaydi?

“Men shunaqa rejissorlarni ko‘rganman, Shahzodani ilk bor kinoga olib kirgan yillarda rejissor Jahongir Ahmedov ‘Tundan tonggacha’ filmida aktyor, aktrisani holatga kirgizish uchun yaxshi dars bera olgan. Ko‘zlari bilan tushuntirib, holatga kirgizib, keyin suratga olish ishlarini boshlar edi. Hozirgi ko‘plab yosh rejissorlar esa shunaqa o‘ynaysiz deb tushuntirib beradi, bo‘ldi, o‘zingiz rol o‘ynab berishingiz kerak. Baribir aktrisani holatga kirgizishdan oldin rejissorning o‘zi o‘sha rolni o‘ynab berishi kerak deb bilaman”, — deydi Gulmira Muhammedova.

Gulmira Muhammedova qizining tarbiyasida qattiq turgani, qizi u bilan ishlashni istamagan paytlari haqida

“Ko‘p aktrisalarni kuzatyapmiz, yulduzlik kasalligiga uchrab qolyapti. Bu sinovli o‘tish davridan o‘tolmay qolayotganlari ham bor. Xuddi shu masalada men Shahzodaga qattiq turganman. Mayli, meni yomon ko‘rsang ham, oyog‘ing yerdan uzilmasin, qoqilmaslik uchun seni tanqid qiladigan inson bo‘lib qolaman der edim. Sahna ortida baribir urushib turadigan prodyuser bo‘ladi. Sahnaga chiqqanida qayerda xato qilayotgan yoki xatti-harakatlari noto‘g‘ri bo‘layotgan bo‘lsa, konsert bo‘ladimi yoki boshqa suratga olish jarayonlari bo‘ladimi, darrov sahna ortiga o‘tib, mana shu yerlarida xato qilayotganini, qaytib shuni takrorlamasligi kerakligini aytar edim.

Takrorlasa, qattiq urishar edim, chunki har bitta narsani, jurnalistikani, teleboshlovchilikni, aktrisalikni ham o‘zining etika, estetikasi bor. Birpasda o‘tlab ketish kerak emas, me’yorni bilish, undan chiqib ketmaslik kerak. Men shu narsaga qattiq turganman, mayli, vaqti kelsa mening tanqidchiligimdan bezor bo‘lgandir, mensiz ishlashni xohlab qolgan paytlari ham, mening qo‘limdan chiqib ketishni istagan vaqtlari ham ko‘p bo‘ldi. Men qo‘yib yuborib ham ko‘rdim, lekin aylanib qaytib keldi”, — deydi aktrisa.

Aktrisa bir muddat Azamat Ahrorov sabab qizi bilan gaplashmay qo‘ygani, kuyovi Marat bilan gaplashish uchun Moskvaga borgani haqida

“Bu piar emas edi, Azamat Ahrorov haqiqatan ham Shahzodaning qo‘lini so‘ragan edi. Ochig‘ini aytaman, men bu masalaga boshidan yo‘q deb turib olganman, hattoki Shahzoda bilan qarama-qarshi bo‘lib, ancha vaqt gaplashmaganmiz. O‘g‘lim ham, men ham norozi bo‘lganmiz, faqat qaynonam, hoji ona Shahzodaga yon bosgan. Uni bo‘ynimga olaman, chunki onaning duosisiz sen turmush qura olarmikansan, deganman. Meni norozi qilib, bu bola bilan turmush qura olmaysan, turmush qurganing bilan uzoqqa bora olmaysan, dedim.

U sening insoning emas, deb aytganman. Onaning yuragi his qiladi, ichidan biladi, men ham Shahzodaning insoni kim ekanini sezganman. Kuyovim Maratjondan taklif bo‘lganda, avvaliga to‘gri, yo‘q deganman, keyin Moskvaga borib, yaxshilab gaplashganman. Uning gap-so‘zini olganimdan keyin Shahzodaga mana shu sening insoning, deganman. Shu inson seni har tomonlama qo‘llab-quvvatlaydi, san’atingga nuqta qo‘ymaydi, buni tushunadi, sababi u baribir zamonaviy, tushunadigan inson deganman, xullas, bir ko‘rishda kuyovim bilan gap-so‘zimiz bir-biriga to‘g‘ri kelgan”, — deydi Gulmira Muhammedova.

Gulmira Muhammedovaning kuyovi Shahzoda Muhammedovaga boyligi uchun uylanganmi?

“Ochig‘ini aytaman, kuyovim Shahzodaning puli uchun uylangan degan fikrga qo‘shila olmayman. Kuyovim o‘ziga yarasha puli, biznesi, qobiliyati bor inson, shuning uchun ham kuyov sifatida tanlaganman. Shahzoda ham boshidan men o‘zimdan kuchli, aqlli inson bilan turmush quraman, degan, menda ham shu fikr bo‘lgan. Endi shunaqa o‘tish davri bo‘ldi, Moskvani tashlab, O‘zbekistonga kelgan insonni qo‘llab-quvvatlash kerak edi, albatta, qo‘lladik. Hamma biznesimni kuyovimga berib, mard bo‘lib, o‘yindan chiqib ketdim. Qizimni berdimmi, qizimga qo‘shib uning hamma biznesini ham berdim. Men 50 yoshga kirganimda hammasini boshidan boshlay olishimga ishondim”, — deydi aktrisa.

Vaqti kelib Shahzoda Muhammedova san’atni tark etaman desa, bunga aktrisa qanday munosabat bildiradi?

“U menga turmush o‘rtog‘im yo‘q deyapti, san’atni tark etaman desa, mayli, deyman, oila bu muqaddas narsa va o‘rtada farzand bor. Shu turmush o‘rtog‘iga yoqmayaptimi, nuqta qo‘yilishi kerak bo‘lsa, qo‘yiladi. Beva bo‘lish oson emas, uni chidaganga chiqargan. Ko‘chada yurishning o‘zi oson emas, uning uchun o‘zingizga ishongan bo‘lishingiz kerak. Hozir yoshim 50 ga chiqqan bo‘lsa ham, ortimdan pichoq uradigan insonlar ham topilyapti, birinchi bo‘lib o‘z insonlarim shu ishni qilyapti. Mevali daraxtga tosh otiladi, deb bekorga aytishmagan. Bir paytlar o‘sha insonlar yiqilsa, turg‘izib qo‘yganman, vaqti kelsa sinsa, singan joyini tuzatganman. Kutilmagan vaqtda eng yaqin insonlar o‘zini sizga raqib deb bilar ekan. Buni hayotdagi tajribamdan kelib chiqib gapiryapman”, — deydi Gulmira Muhammedova.

Shahzoda onasidan minnatdormi?

“U hozir mendan minnatdor emas, chunki hali yulduzlik osmonida uchib yuribdi. U hozir tan olmaydi buni. U qachonki onasining qadamlariga zor bo‘lsa, tan oladi bu narsani”, — deydi Gulmira Muhammedova.