Latofatli aktrisa, nafaqat o‘zbek kino olamida o‘z o‘rniga ega bo‘lgan, balki chet el kinofilmlarida suratga tushib, muvaffaqiyatga erishgan, “Mening akam bo‘ydoq”, “Orzudagi ayol”, “Makrli dunyo”, “So‘nggi istak” kinokartinalaridagi roli bilan muxlislarning qalbidan joy olgan Sitora Farmonova 20-avgust kuni 38 yoshni qarshi oldi. Shu munosabat bilan “Daryo” nashri aktrisaning hayot va ijod yo‘li haqida ma’lumot beradi.
Dizaynerlikda tahsil olib, aktrisalikda muvaffaqiyatga erishgan yulduz
Latofatli aktrisa Sitora Farmonova 1984-yilning 20-avgustida Buxoro shahrida tug‘ilgan. U oilada uch nafar farzandning to‘ng‘ichi bo‘lgan, ya’ni aktrisaning ukasi va singlisi bor. Sitora Farmonova 13 yoshida oilasi bilan Toshkent shahriga ko‘chib o‘tgan. U dastlab dizayner bo‘lishni orzu qilib, shu sohada tahsil oladi, biroq keyinchalik fikrini o‘zgartirib, aktrisa bo‘lish orzusida Toshkent davlat san’at va madaniyat institutida tahsil oladi.
Epizod roli bilan kino olamiga kirib kelgan
Aktrisa kino olamidagi faoliyatini “Ayol zoti” serialidagi epizod roli bilan boshlagan va 16 yoshida ilk bor klipda suratga tushgan. Sitora Farmonova 2004-yilda “Xavfli burilish” kinokartinasida rol ijro etdi va ushbu filmdagi roli orqali tomoshabinlarning qalbidan joy egalladi. Shundan keyin aktrisa “Kelgindi qaynona”, “Uchinchi tilak”, Qasd”, “Makrli dunyo”, “Qadrdonlar”, “Dinozavr qoldirgan iz” kabi filmlarda suratga tushdi.
Syomkada bir o‘limdan qolgan aktrisa
Aktrisaning rollari nafaqat o‘zbek rejissorlarining, balki qozoq va qirg‘iz kinoijodkorlarining ham e’tiboriga tushadi. Sitora Farmonova nemis rejissori Veyit Helmerning 2011-yilda suratga olingan “Baykonur” filmida yiqilib tushib, og‘ir jarohat olgan. Bu rol sabab aktrisaning bo‘yni yirtilib, ochilib qolgan. Rol unga katta muvaffaqiyat ketirgan, biroq Sitora Farmonova shu sabab bir o‘limdan qolgan. Shundan keyin aktrisa 2013-yil Qirg‘izistonda suratga olingan “Yotoqxona” serialida ham rol o‘ynagan. Serial muxlislar tomonidan yaxshi kutib olingan va aktrisa Qirg‘izistonda ham shuhrat qozongan.
Xonandalikda va qiziqchilikda o‘zini sinab ko‘rgan
Sitora Farmonova aktrisalikdan tashqari o‘zini qiziqchilik va xonandalik yo‘nalishida sinab ko‘rgan. Uning xonanda Mirjalol bilan birga ijro etgan “Bahor-kuz” nomli taronasi muxlislar va tanqidchilarning e’tirofiga sazovor bo‘lgan. Shundan keyin aktrisa “Ayt”, “Chamanda gul” taronalarini ijro etgan. U chet el xonandasi bilan ham duet kuylagan, qirg‘izistonlik Mirbek Atabekov ijro etgan “Ikki yurak” taronasi “Yotoqxona” serialining saundtrekiga aylangan. Aktrisa 2015-yildan boshlab “Aziya Miks” nomli jamoa a’zosi sifatida “Quvnoqlar va zukkolar” tanlovida ishtirok etadi. Jamoa turli mamlakat fuqarolari: tojikistonlik, o‘zbekistonlik, qozog‘istonlik va qirg‘izistonlik o‘yinchilardan iborat.
Tanqidlar ostida qolgan va san’atda qiyinchiliklarga duch kelgan aktrisa
Sitora Farmonova 2016-yilda, “Quvnoqlar va zukkolar” tanlovidan so‘ng “O‘zbeknavo” tomonidan beriladigan litsenziyasidan mahrum qilingan. Bunga esa aktrisaning xorijga chiqish tartib-qoidalarini buzgani sabab bo‘lgan. Bundan tashqari, aktrisaning tanlovda chiqishi ko‘plab tanqidlarga uchragan. Keyinchalik aktrisa bu holatga munosabat bildirib, litsenziyasi olib qo‘yilganini bilmaganini, yana litsenziya olishi haqida gapirgan.
Sitora Farmonova qiymati 700 ming dollarga teng Gollivud kinofilmida suratga tushishni rad etgan
Aktrisa 2008-yilda Gollivuddan tushgan loyiha taklifini rad etgan. Sony Intertainment Productions tomonidan suratga olinayotgan serial ikki yillik shartnomani o‘z ichiga olgan va loyiha kontrakti 700 ming dollarga teng bo‘lgan. U o‘sha paytda 24 yoshda bo‘lgani, serialning 50-qismidan keyingi nojo‘ya sahnalar uchun loyihani rad etganini aytgan. Aktrisa uchun pul emas, odob-axloq, hayo, or-nomus birinchi o‘rinda turishini ta’kidlagan.
Shaxsiy hayoti va oilasi haqidagi ma’lumotni sir saqlovchi aktrisa
O‘zbek-shou biznesining ayrim vakillari singari Sitora Farmonova ham shaxsiy hayoti bilan bog‘liq ma’lumotlarni sir saqlashni to‘g‘ri deb biladi. Aktrisa ba’zida ijtimoiy tarmoqlardagi sahifasiga onasi va ukasi bilan tushgan suratlarini joylab turadi. Bundan tashqari, u nima sababdan haligacha turmush qurmaganining sababini so‘ragan muxlislariga bu shaxsiy masala ekanini, umuman olganda, muxlislaridan shaxsiy hayoti bilan bog‘liq ma’lumotlarni so‘ramasligini va bu holatni to‘g‘ri tushunish kerakligini ta’kidlagan.
Sitora Farmonova nima sababdan shu vaqtga qadar turmush qurmagani haqida
Aktrisa shu vaqtga qadar nima sababdan turmush qurmagani haqidagi savolga “Hayotimda go‘zalligim va ijodimni baholamasdan, meni tushuna oladigan, borimcha qabul qila oladigan insonni hali uchratmaganman, balki shu sabab bo‘layotgandir”, — deya javob bergan. Bundan tashqari, u shaxsiy hayoti bilan tarqalgan mish-mishlarga javob qaytarmasligi haqida ham gapirgan. Aktrisaga o‘zbek shou-biznesining taniqli vakillari turmush qurishni taklif qilgan, biroq Sitora Farmonova ularning barchasini rad etgan.
Aziz Rametovning turmush qurish taklifini rad etgan, biroq o‘zidan 15 yosh kichik bloger Doniyor Qayumov bilan piar qilgan
Aktrisaning onasi Zamira Farmonova “Sevimli” telekanalining “Mashhurlar” loyihasi mehmoni bo‘lgan va ko‘rsatuvda Zamira Farmonova taniqli aktyor Aziz Rametov qizining qo‘lini so‘ragani haqida so‘zlab bergan.
“Aziz Rametov bir necha marta qizimga uylanish niyati borligini aytgan. Onajon, xo‘p deng, qizingizga uylanaman, sovchi yuboraman, u bilan necha yildan beri bir-birimizni taniymiz, xarakterimizni bilamiz, degan. Lekin taqdir ekan. Allohim bularning yulduzlarini bir-biriga o‘xshatmadi. Aziz Rametov juda yaxshi bola, uning onasini taniyman, juda yaxshi inson”, — degan edi Zamira Farmonova.
Sitora Farmonova 2020-yilda o‘zidan 15 yosh kichik bloger Doniyor Qayumov bilan yaqin munosabatda ekani va ularning turmush qurishi haqida mish-mishlar tarqaldi. Bunga esa Doniyor Qayumov va Sitora Farmonovaning birgalikda suratga tushgan rasmlari va videolari sabab bo‘lgan. Oradan bir oy o‘tib bloger Sitora Farmonova bilan munosabatlari tugaganini, bu esa aktrisa gap-so‘zlarga ishongani tufayli bo‘lganini ta’kidlagan. Vaqt o‘tib ularning ikkalasi ham sahifasidan birga tushgan surat va videolarini o‘chirib tashlagan.
Kliplardagi bir-birini takrorlamaydigan ijrolar
Aktrisa san’at olamidagi faoliyati davomida ko‘plab xonandalarning klipida suratga tushgan. Shohruxxonning “Oddiy bola”, “Salom sevgi”, Munisa Rizayevaning “Yomg‘ir”, “Dil” va bundan tashqari ko‘plab kliplarda turli xil obrazlarni gavdalantirgan.
Mavzuga doir:
- Javohir Zokirov, Alisher Uzoqov, Sitora Farmonova. Chet el kinofilmlarida rol ijro etgan o‘zbek aktyorlari (video).
- Instagram: Yangi mashinali bo‘lgan Sitora Farmonova, Otabek Mutalxo‘jayevning otasiga qimmatbaho sovg‘asi, kinoga qaytayotgan Zarina Nizomiddinova.
- Instagram: Otabek Mirzaxolov yangi mashina xarid qildi, Sitora Farmonova qanday insonga turmushga chiqadi? Nuriddin Hamroqulov xonadonida to‘y.
- Instagram: Jahongir Otajonovning Prezident bilan uchrashgan qiyofadoshi, tug‘ilgan kunini nishonlagan Sitora Farmonova, Sevinchdan ajabtovur raqs.
Izoh (0)