Актриса Гулмира Муҳаммедова «Севимли» телеканалининг «Машҳурлар» кўрсатувига берган интервьюсида санъатга нима сабабдан қайтгани, кино оламида уни нима қониқтирмаслиги, қизининг тарбиясида қаттиқ тургани, уни танқид қилгани, Азамат Аҳроров Шаҳзода Муҳаммедованинг қўлини сўрагани, қизи билан бу масалада келишолмай бир муддат гаплашмагани, куёви қизига пули учун уйлангани ҳақидаги миш-мишларга жавоби, вақти келиб Шаҳзода Муҳаммедова санъатни тарк этишини айтса, бунга муносабати ҳақида гапирди.
Гулмира Муҳаммедова нима сабабдан санъатга қайтгани ҳақида
«Мен 15 йилдан буён кино соҳасида ишлайман, продюсерлик соҳасида ҳам фаолият юритиб, бир нечта фильмларда ва клипларда эпизодик ролларда иштирок этганман. Ҳозирги кунда эса бош ролларни ҳам ижро этяпман. Ижодимда пандемия даврида, қизимни турмушга берган вақтимда икки йил танаффус қилдим. Қизимни Москвага турмушга берганимдан кейин мен кино соҳасидаги фаолиятимга қайтмайман деб ўйлагандим. Тадбиркорлик ишларимни ҳаммасини бошидан бошлаётган эдим. Бу пешонага ёзилган экан, тўғрисини айтсам, бу нарса менинг тушимда аён бўлди.
Тушимда сен санъатнинг одамисан, деб уйғотишар эди, нимага бунақа бўляпти, деб ҳайрон бўлардим. Бу тушимни қайта-қайта кўраверардим, лекин мен бунга бўйин эгмасдим ва инкор этардим. Энди бўлди, кеч бўлди, давр ўтди, 50 ёшга кирдик деганман, бу соҳани ўйламаганман, қайтиб кириш ниятим ҳам бўлмаган. Бироқ пешонага ёзилганидан ҳеч ким қочиб қутулмас экан. Агар сиз санъатга керак бўлсангиз, санъат сизни чақириб олар экан», — дейди актриса.
Актрисани кино оламида нима қониқтирмайди?
«Мен шунақа режиссёрларни кўрганман, Шаҳзодани илк бор кинога олиб кирган йилларда режиссёр Жаҳонгир Аҳмедов ‘Тундан тонггача’ фильмида актёр, актрисани ҳолатга киргизиш учун яхши дарс бера олган. Кўзлари билан тушунтириб, ҳолатга киргизиб, кейин суратга олиш ишларини бошлар эди. Ҳозирги кўплаб ёш режиссёрлар эса шунақа ўйнайсиз деб тушунтириб беради, бўлди, ўзингиз рол ўйнаб беришингиз керак. Барибир актрисани ҳолатга киргизишдан олдин режиссёрнинг ўзи ўша ролни ўйнаб бериши керак деб биламан», — дейди Гулмира Муҳаммедова.
Гулмира Муҳаммедова қизининг тарбиясида қаттиқ тургани, қизи у билан ишлашни истамаган пайтлари ҳақида
«Кўп актрисаларни кузатяпмиз, юлдузлик касаллигига учраб қоляпти. Бу синовли ўтиш давридан ўтолмай қолаётганлари ҳам бор. Худди шу масалада мен Шаҳзодага қаттиқ турганман. Майли, мени ёмон кўрсанг ҳам, оёғинг ердан узилмасин, қоқилмаслик учун сени танқид қиладиган инсон бўлиб қоламан дер эдим. Саҳна ортида барибир урушиб турадиган продюсер бўлади. Саҳнага чиққанида қаерда хато қилаётган ёки хатти-ҳаракатлари нотўғри бўлаётган бўлса, концерт бўладими ёки бошқа суратга олиш жараёнлари бўладими, дарров саҳна ортига ўтиб, мана шу ерларида хато қилаётганини, қайтиб шуни такрорламаслиги кераклигини айтар эдим.
Такрорласа, қаттиқ уришар эдим, чунки ҳар битта нарсани, журналистикани, телебошловчиликни, актрисаликни ҳам ўзининг этика, эстетикаси бор. Бирпасда ўтлаб кетиш керак эмас, меъёрни билиш, ундан чиқиб кетмаслик керак. Мен шу нарсага қаттиқ турганман, майли, вақти келса менинг танқидчилигимдан безор бўлгандир, менсиз ишлашни хоҳлаб қолган пайтлари ҳам, менинг қўлимдан чиқиб кетишни истаган вақтлари ҳам кўп бўлди. Мен қўйиб юбориб ҳам кўрдим, лекин айланиб қайтиб келди», — дейди актриса.
Актриса бир муддат Азамат Аҳроров сабаб қизи билан гаплашмай қўйгани, куёви Марат билан гаплашиш учун Москвага боргани ҳақида
«Бу пиар эмас эди, Азамат Аҳроров ҳақиқатан ҳам Шаҳзоданинг қўлини сўраган эди. Очиғини айтаман, мен бу масалага бошидан йўқ деб туриб олганман, ҳаттоки Шаҳзода билан қарама-қарши бўлиб, анча вақт гаплашмаганмиз. Ўғлим ҳам, мен ҳам норози бўлганмиз, фақат қайнонам, ҳожи она Шаҳзодага ён босган. Уни бўйнимга оламан, чунки онанинг дуосисиз сен турмуш қура олармикансан, деганман. Мени норози қилиб, бу бола билан турмуш қура олмайсан, турмуш қурганинг билан узоққа бора олмайсан, дедим.
У сенинг инсонинг эмас, деб айтганман. Онанинг юраги ҳис қилади, ичидан билади, мен ҳам Шаҳзоданинг инсони ким эканини сезганман. Куёвим Маратжондан таклиф бўлганда, аввалига тўгри, йўқ деганман, кейин Москвага бориб, яхшилаб гаплашганман. Унинг гап-сўзини олганимдан кейин Шаҳзодага мана шу сенинг инсонинг, деганман. Шу инсон сени ҳар томонлама қўллаб-қувватлайди, санъатингга нуқта қўймайди, буни тушунади, сабаби у барибир замонавий, тушунадиган инсон деганман, хуллас, бир кўришда куёвим билан гап-сўзимиз бир-бирига тўғри келган», — дейди Гулмира Муҳаммедова.
Гулмира Муҳаммедованинг куёви Шаҳзода Муҳаммедовага бойлиги учун уйланганми?
«Очиғини айтаман, куёвим Шаҳзоданинг пули учун уйланган деган фикрга қўшила олмайман. Куёвим ўзига яраша пули, бизнеси, қобилияти бор инсон, шунинг учун ҳам куёв сифатида танлаганман. Шаҳзода ҳам бошидан мен ўзимдан кучли, ақлли инсон билан турмуш қураман, деган, менда ҳам шу фикр бўлган. Энди шунақа ўтиш даври бўлди, Москвани ташлаб, Ўзбекистонга келган инсонни қўллаб-қувватлаш керак эди, албатта, қўлладик. Ҳамма бизнесимни куёвимга бериб, мард бўлиб, ўйиндан чиқиб кетдим. Қизимни бердимми, қизимга қўшиб унинг ҳамма бизнесини ҳам бердим. Мен 50 ёшга кирганимда ҳаммасини бошидан бошлай олишимга ишондим», — дейди актриса.
Вақти келиб Шаҳзода Муҳаммедова санъатни тарк этаман деса, бунга актриса қандай муносабат билдиради?
«У менга турмуш ўртоғим йўқ деяпти, санъатни тарк этаман деса, майли, дейман, оила бу муқаддас нарса ва ўртада фарзанд бор. Шу турмуш ўртоғига ёқмаяптими, нуқта қўйилиши керак бўлса, қўйилади. Бева бўлиш осон эмас, уни чидаганга чиқарган. Кўчада юришнинг ўзи осон эмас, унинг учун ўзингизга ишонган бўлишингиз керак. Ҳозир ёшим 50 га чиққан бўлса ҳам, ортимдан пичоқ урадиган инсонлар ҳам топиляпти, биринчи бўлиб ўз инсонларим шу ишни қиляпти. Мевали дарахтга тош отилади, деб бекорга айтишмаган. Бир пайтлар ўша инсонлар йиқилса, турғизиб қўйганман, вақти келса синса, синган жойини тузатганман. Кутилмаган вақтда энг яқин инсонлар ўзини сизга рақиб деб билар экан. Буни ҳаётдаги тажрибамдан келиб чиқиб гапиряпман», — дейди Гулмира Муҳаммедова.
Шаҳзода онасидан миннатдорми?
«У ҳозир мендан миннатдор эмас, чунки ҳали юлдузлик осмонида учиб юрибди. У ҳозир тан олмайди буни. У қачонки онасининг қадамларига зор бўлса, тан олади бу нарсани», — дейди Гулмира Муҳаммедова.
Изоҳ (0)