BMT bosh kotibi Antoniu Guterrish Ukrainaga tashrifi doirasida Odessa portiga keldi, deb yozadi “RBK” Oliy rada deputati Aleksey Goncharenkoning Telegram-kanaliga tayanib.
“Odessa, port. BMT bosh kotibi Guterrish yetib keldi”, — deb yozdi u.
Guterrish 17-avgustdan buyon Ukrainada tashrif bilan bo‘lib turibdi. 18-avgust kuni u Ukraina prezidenti Vladimir Zelenskiy va Turkiya prezidenti Rajab Toyyib Erdo‘g‘on bilan uchrashdi.
Uchrashuvda tomonlar Ukraina donini yetkazib berishni, shuningdek, Zaporojye AES atrofidagi vaziyatni muhokama qildi.
Odessada BMT bosh kotibi Zelenskiy va Erdo‘g‘on bilan Ukraina donini Qora dengiz orqali yetkazib berish haqidagi muzokaralarni davom ettiradi.
Bu Guterrishning Rossiya maxsus operatsiyasi boshlanganidan buyon Ukrainaga ikkinchi tashrifidir. Aprel oxirlarida u Kiyevda prezident Zelenskiy bilan uchrashgandi.
Ukrainaga bostirib kirganidan keyin Rossiya Qora dengizda urushga qadar Ukraina oziq-ovqat eksportining asosiy markazlari bo‘lgan ukrain portlarini egallab oldi yoki yopib qo‘ydi.
22-iyul kuni Rossiya va Ukraina BMT va Turkiya vositachiligida ukrain doni eksportini Qora dengiz orqali — “Odessa”, “Chernomorsk” va “Yujniy” portlaridan qayta tiklash haqida kelishib oldi.
Izoh (0)