Yevropa Ittifoqi vositachiligidagi muzokaralar Serbiya va Kosovo o‘rtasidagi taranglikni bartaraf eta olmadi, deb xabar bermoqda Deutsche Welle.
Serbiya prezidenti Aleksandr Vuchich va Kosovo bosh vaziri Albin Kurti Bryusseldagi muzokaralarda kelishuvga erisha olmadi. Shu bilan birga, Yevropa Ittifoqi tashqi siyosati rahbari Jozep Borrel mamlakatlar muzokaralarni davom ettirishga kelishib olganini aytdi. Uning qo‘shimcha qilishicha, ikki Bolqon davlati rahbarlari o‘rtasidagi muzokaralar “yaqin kunlarda” qayta boshlanadi.
“Afsuski, biz kelishuvga erishmadik. Biroq bu bilan muammolarni hal qilishga urinishlar tugamadi, yaqin kunlarda yangi muzokaralar bo‘lib o‘tadi. Men taslim bo‘lmayman... Yechim izlashimiz shart”, — deyiladi Borrelning bayonotida.
Qayd etilishicha, muzokaralardan oldin ham Vuchich kelishuvga erishish borasida optimizm ko‘rsatmagan.
“Qandaydir yechimga umid qilishda davom etsam-da, bunga shubha bilan qarayapman”, — deb yozgan u Twitter’da. Kurti esa Kosovo shimolida barrikadalar o‘rnatayotgan “noqonuniy serb tuzilmalari”ni tanqid qilgan.
Eslatib o‘tamiz, Serbiya va Kosovo o‘rtasidagi taranglik avgust oyi boshida yana kuchaydi. Vuchich Kosovo politsiyasi yarim tunda respublikadagi serblarga qarshi harbiy operatsiya boshlaganini da’vo qildi. 1-avgustdan boshlab Serbiya hujjatlari Kosovoda o‘z kuchini yo‘qotishi kerak edi.
Bir muncha vaqt o‘tgach, Kosovo respublikasining asosan, serblar yashaydigan shimoliy hududlarida havo hujumi sirenalari ishga tushirilgani va aholi barrikadalar qura boshlagani haqida ma’lumot paydo bo‘ldi. Keyinchalik Kosovo hukumati Yevropa Ittifoqi va AQSH elchilari bilan maslahatlashganidan so‘ng Serbiya hujjatlariga taqiq qo‘yish tartibini 1-sentabrga qoldirdi.
Ma’lumot uchun, Kosovo 2008-yilda Serbiya tarkibidan chiqib, o‘z mustaqilligini e’lon qilgan. Serbiya haligacha respublika mustaqilligini tan olmaydi. Kosovoni 116 davlat, jumladan AQSH va Yevropa Ittifoqining aksariyat davlatlari tan olgan.
Izoh (0)