Rossiya BMT bosh kotibi Antoniu Guterrishning Rossiya qo‘shinlari tomonidan egallab olingan Zaporojye AES atrofidagi hududni qurolsizlantirish haqidagi taklifini rad etdi, deb yozadi DW.
Zaporojye AES atrofida qurolsizlantirilgan hudud yaratish taklifi “nomaqbul”, chunki bu stansiyani yanada zaif qilib qo‘yadi, dedi Rossiya TIV vakili Ivan Nechayev 18-avgust, payshanba kuni.
Ayni vaqtda, u Rossiya AES hududiga Xalqaro atom energiyasi agentligi (MAGATE) mutaxassislarini kiritishga rozi ekanini ma’lum qildi.
“Eng yaqin vaqtlarda MAGATE ekspertlari Zaporojye AESga borishini kutyapmiz, ushbu tashrif iyundayoq to‘liq kelishilgan edi”, — dedi Nechayev.
Zaporojye AES — Yevropadagi eng yirik atom elektr stansiyasi. U Energodar shahrida joylashgan. Mart oyidan buyon uni va butun shaharni Rossiya qo‘shinlari nazorat qilib kelmoqda. Avgust oyida stansiya bir necha marta o‘qqa tutildi. Ukraina va Rossiyada ushbu zarbalarda bir-birini ayblamoqda.
G7 mamlakatlari Moskvani zudlik bilan AES ustidan nazoratni Kiyevga qaytarishga chaqirdi, ushbu da’vatni yana 35 ta mamlakat qo‘llab-quvvatladi. BMT AESdan harbiylar va texnikani olib chiqib ketishni va u yerda qurolsizlantirilgan hudud yaratishni taklif qildi. O‘z navbatida, Rossiya nazorati ostidagi Zaporojye viloyati hukumati stansiya atrofida osoyishtalik rejimini e’lon qilishni taklif etdi.