БМТ бош котиби Антониу Гутерриш Украинага ташрифи доирасида Одесса портига келди, деб ёзади «РБК» Олий рада депутати Алексей Гончаренконинг Telegram-каналига таяниб.
«Одесса, порт. БМТ бош котиби Гутерриш етиб келди», — деб ёзди у.
Гутерриш 17 августдан буён Украинада ташриф билан бўлиб турибди. 18 август куни у Украина президенти Владимир Зеленский ва Туркия президенти Ражаб Тоййиб Эрдўғон билан учрашди.
Учрашувда томонлар Украина донини етказиб беришни, шунингдек, Запорожье АЭС атрофидаги вазиятни муҳокама қилди.
Одессада БМТ бош котиби Зеленский ва Эрдўғон билан Украина донини Қора денгиз орқали етказиб бериш ҳақидаги музокараларни давом эттиради.
Бу Гутерришнинг Россия махсус операцияси бошланганидан буён Украинага иккинчи ташрифидир. Апрель охирларида у Киевда президент Зеленский билан учрашганди.
Украинага бостириб кирганидан кейин Россия Қора денгизда урушга қадар Украина озиқ-овқат экспортининг асосий марказлари бўлган украин портларини эгаллаб олди ёки ёпиб қўйди.
22 июль куни Россия ва Украина БМТ ва Туркия воситачилигида украин дони экспортини Қора денгиз орқали — «Одесса», «Черноморск» ва «Южний» портларидан қайта тиклаш ҳақида келишиб олди.
Изоҳ (0)