Turkiya prezidenti saylovi o‘tkaziladigan sana ma’lum bo‘ldi, unda Erdo‘g‘on o‘z nomzodini qo‘yadi
Turkiya Adliya vazirligi mamlakat prezidenti saylovini 2023-yil 18-iyunga belgiladi. Unda Rajab Toyyib Erdo‘g‘on o‘z nomzodini qo‘yadi, dedi vazirlik rahbari Bekor Bozdag. Avvalroq Turkiya muxolifati Erdo‘g‘on saylovda qatnasha olmasligini, chunki bu uning ushbu lavozimdagi uchinchi muddati bo‘lishini aytgandi.
“Turkiya prezidenti saylovi 2023-yil 18-iyunda bo‘lib o‘tadi. U bizning prezidentimiz o‘z nomzodini qo‘yadigan ikkinchi saylov bo‘ladi”, — dedi Bekor Bozdag Milliyet gazetasiga bergan intervyusida.
Avvalroq “Xalq alyansi” hukmron bloki (Adolat va taraqqiyot partiyasi hamda ultra o‘ng Natsionalistlar harakati partiyasi kiradi) Turkiya prezidenti saylovi uchun Rajab Toyyib Erdo‘g‘onni yagona nomzod sifatida ilgari surishini ma’lum qilgandi. Boshqa partiyalar ulardan kim o‘z nomzodini qo‘yishini hozircha aytgani yo‘q.
Sal avvalroq muxolifat vakillari Rajab Toyyib Erdo‘g‘on 2023-yildagi saylovda qatnasha olmasligini, chunki g‘olib bo‘lgan taqdirda, bu u uchun uchinchi prezidentlik muddatiga aylanishini, bu esa mamlakat qonunchiligiga zid ekanini aytgandi. Adliya vazirligi 2023-yilgi saylov Erdo‘g‘on uchun Turkiya 2018-yilda boshqaruvning parlament shaklidan prezidentlik shakliga o‘tganidan keyingi ikkinchi saylov ekanini ma’lum qildi.
Rajab Toyyib Erdo‘g‘on 2014-yilda birinchi to‘g‘ridan to‘g‘ri prezidentlik saylovida g‘olib bo‘lganidan buyon ushbu lavozimni egallab keladi. 2017-yilda Turkiyada konstitutsiyaga tuzatishlar kiritish haqida referendum bo‘lib o‘tdi, ular orasida boshqaruvning prezidentlik shakliga o‘tish taklifi ham bo‘lgan. Tuzatishlar 2019-yilda kuchga kirishi kerak edi, biroq 2018-yilda Erdo‘g‘on muddatidan oldingi prezident va parlament saylovlarini belgiladi, ularda o‘zi va “Xalq alyansi” g‘alaba qozondi.
