Ukraina prezidenti Vladimir Zelenskiy AQSH tomonidan Rossiyaning “maxsus harbiy operatsiya” boshlash rejalari haqida ogohlantirilganini, ammo bu haqda fuqarolarga aytmaslikka qaror qilganini tan oldi. Bu haqda u Amerikaning The Washington Post gazetasiga bergan intervyusida ma’lum qildi, shundan keyin mamlakatda misli ko‘rilmagan darajada tanqidga uchradi, deb yozadi BBC.
“U AQSHning Rossiya hujum qilishni rejalashtirayotgani haqidagi ko‘plab ogohlantirishlari tafsilotlarini ukrainaliklar bilan bo‘lishmagani sabablarini tushuntirib, The Washington Post’ga bergan izohlari shunga olib keldiki, pufak yorilib, urush boshidan buyon misli ko‘rilmagan ko‘lamda jamoatchilik tanqidi yog‘ildi”, — deb yozadi nashr.
Intervyuda Zelenskiy o‘z qarorini odamlar vahimaga tushib, mamlakatdan qochib ketishidan qo‘rqqani bilan izohladi. Uning tushuntirishicha, tartibsizlik urug‘ini sochmaslik va iqtisodiy muammolarni qo‘zg‘atmaslik uchun bu xavf haqida mamlakat fuqarolariga aytib o‘tirmagan. Zelenskiy shunday raqamlarni keltirib o‘tdi: hozir Ukraina urush tufayli oyiga 5—7 milliard dollar yo‘qotmoqda. Bunaqa yuklamani qish paytida va isitish mavsumida mamlakat ko‘tara olmagan bo‘lardi, deb ishonch bildirdi prezident.
“Ko‘plab ukrainlar Zelenskiy ularning farovonligini emas, iqtisodiy ahvolni birinchi o‘ringa qo‘ygan, degan xulosaga kelib, norozi bo‘ldi va agar hukumat aholini urushga tegishlicha tayyorlaganida, ko‘plab hayotlar qutqarilgan bo‘lardi, deb taxmin qildi”, — deb yozadi The Washington Post.
Avvalroq AQSH prezidenti Jo Bayden Amerika razvedka xizmatlari Vashingtonga oldindan Rossiya tomonining Ukrainada maxsus harbiy operatsiya o‘tkazish rejalari haqida ma’lumot taqdim etganini da’vo qilgandi.
Ayni paytda Zelenskiy G‘arbdagi sheriklar ehtimoliy hujum tafsilotlarini ma’lum qilmaganini, u haqda “umumiy gaplar” gapirganini aytmoqda.
“O‘sha vaqtda Byorns nima degani haqida hamma narsani aytib berishga tayyor emasman, ammo o‘shanda uning asosiy signallari mening hayotimga bo‘lgan tahdid haqida edi. Va ular birinchi signallar emasdi — ular har tomondan kelib tushardi, bizning maxsus xizmatlarimizdan, chet ellik hamkasblarimizdan va hokazo, — dedi prezident. — Menga hech kim: ‘Quloq sol, sen odamlaringni hozir tayyorlashni boshlashing kerak va ularga pul va oziq-ovqat g‘amlab qo‘yish zarurligini aytishing kerak’ demagan…”
U o‘zining qarorini to‘g‘ri deb hisoblaydi va u hujumga tayyorgarlik ko‘rishda yordam berganini aytmoqda.
Davlat rahbari AQSHdan yordam uchun minnatdorligini bildirdi. Biroq Rossiya hujumini qaytarish uchun Ukrainaga ittifoqdoshlardan yanada ko‘proq hajmda qurol-yarog‘ kerakligini ta’kidlamoqda.
Izoh (0)