Xitoyda kuchli qurg‘oqchilikka qarshi kurashish uchun sun’iy yomg‘ir chaqirilmoqda (foto)

Xitoy rekord darajadagi issiqlik to‘lqini fonida qurg‘oqchilikka qarshi kurash choralarini ko‘rmoqda, deb yozadi Reuters.

Xitoy hukumati qurg‘oqchilikdan aziyat chekkan Yantszi daryosi havzasiga ko‘proq suv olib kelish uchun shoshilinch choralar ko‘rmoqda, yordam mablag‘larini ajratmoqda, bulutlarni ko‘paytirmoqda va yangi ta’minot manbalarini ishlab chiqmoqda, chunki issiqlik to‘lqini ekinlar va chorva mollariga rekord darajada zarar yetkazmoqda.

Mamlakat Suv xo‘jaligi vazirligining xabar berishicha, Yantszi daryosi bo‘yidagi qurg‘oqchilik qishloq aholisi va chorva mollari uchun ichimlik suvi xavfsizligiga, shuningdek, hosilning o‘sishiga salbiy ta’sir ko‘rsatmoqda. Vazirlik hududlarni qurg‘oqchilikdan jabr ko‘rgan tumanlarni aniq baholab, suv ta’minotini saqlab qolish, jumladan, vaqtincha suv yetkazib berish, yangi manbalarni o‘zlashtirish va quvur tarmoqlarini kengaytirish rejalarini ishlab chiqishga chaqirdi.

Quyi oqimdagi suv ta’minotini kuchaytirish uchun Xitoyning eng yirik gidroenergetika loyihasi bo‘lgan “Uch dara” to‘g‘oni ham kelgusi 10 kun ichida suv oqimini 500 million kub metrga oshiradi.

Qurg‘oqchilikdan jabr ko‘rgan hududlardagi chorva mollarining bir qismi vaqtincha boshqa hududlarga ko‘chirildi, deya ma’lum qildi Moliya vazirligi. Idoraning qo‘shimcha qilishicha, tabiiy ofat oqibatlarini bartaraf etish uchun 300 million yuan (44,3 million dollar) ajratiladi.

Xitoyning markaziy Xubey provinsiyasi ob-havoni o‘zgartirish bo‘yicha keng ko‘lamli dasturni e’lon qilgan oxirgi hudud hisoblanadi — dastur doirasida yomg‘ir yog‘dirish uchun osmonga kimyoviy raketalar uchiriladi.

Yantszi bo‘yidagi boshqa hududlar ham “bulut ekish” dasturlarini ishga tushirdi, ammo daryo havzasining qurg‘oqchilikdan ta’sirlangan ayrim qismlarida bulut qoplami juda yupqa bo‘lgani tufayli operatsiyalar to‘xtab qolmoqda.

Xitoydagi jazirama to‘lqini 64 kundan buyon davom etmoqda, bu 1961-yildagidan keyingi eng uzoq davom etgan issiqlik to‘lqini, deya xabar beradi mamlakat Milliy iqlim markazi. Selsiy bo‘yicha 40 daraja va undan yuqori haroratni qayd etuvchi meteostansiyalar soni 262 taga yetdi, bu ham rekord ko‘rsatkichdir. Ulardan sakkiztasida havo harorati Selsiy bo‘yicha 44 darajaga yetdi.