Хитойда кучли қурғоқчиликка қарши курашиш учун сунъий ёмғир чақирилмоқда (фото)

Хитой рекорд даражадаги иссиқлик тўлқини фонида қурғоқчиликка қарши кураш чораларини кўрмоқда, деб ёзади Reuters.

Хитой ҳукумати қурғоқчиликдан азият чеккан Янцзи дарёси ҳавзасига кўпроқ сув олиб келиш учун шошилинч чоралар кўрмоқда, ёрдам маблағларини ажратмоқда, булутларни кўпайтирмоқда ва янги таъминот манбаларини ишлаб чиқмоқда, чунки иссиқлик тўлқини экинлар ва чорва молларига рекорд даражада зарар етказмоқда.

Мамлакат Сув хўжалиги вазирлигининг хабар беришича, Янцзи дарёси бўйидаги қурғоқчилик қишлоқ аҳолиси ва чорва моллари учун ичимлик суви хавфсизлигига, шунингдек, ҳосилнинг ўсишига салбий таъсир кўрсатмоқда. Вазирлик ҳудудларни қурғоқчиликдан жабр кўрган туманларни аниқ баҳолаб, сув таъминотини сақлаб қолиш, жумладан, вақтинча сув етказиб бериш, янги манбаларни ўзлаштириш ва қувур тармоқларини кенгайтириш режаларини ишлаб чиқишга чақирди.

Қуйи оқимдаги сув таъминотини кучайтириш учун Хитойнинг энг йирик гидроэнергетика лойиҳаси бўлган «Уч дара» тўғони ҳам келгуси 10 кун ичида сув оқимини 500 миллион куб метрга оширади.

Қурғоқчиликдан жабр кўрган ҳудудлардаги чорва молларининг бир қисми вақтинча бошқа ҳудудларга кўчирилди, дея маълум қилди Молия вазирлиги. Идоранинг қўшимча қилишича, табиий офат оқибатларини бартараф этиш учун 300 миллион юань (44,3 миллион доллар) ажратилади.

Хитойнинг марказий Хубэй провинцияси об-ҳавони ўзгартириш бўйича кенг кўламли дастурни эълон қилган охирги ҳудуд ҳисобланади — дастур доирасида ёмғир ёғдириш учун осмонга кимёвий ракеталар учирилади.

Янцзи бўйидаги бошқа ҳудудлар ҳам «булут экиш» дастурларини ишга туширди, аммо дарё ҳавзасининг қурғоқчиликдан таъсирланган айрим қисмларида булут қоплами жуда юпқа бўлгани туфайли операциялар тўхтаб қолмоқда.

Хитойдаги жазирама тўлқини 64 кундан буён давом этмоқда, бу 1961 йилдагидан кейинги энг узоқ давом этган иссиқлик тўлқини, дея хабар беради мамлакат Миллий иқлим маркази. Цельсий бўйича 40 даража ва ундан юқори ҳароратни қайд этувчи метеостанциялар сони 262 тага етди, бу ҳам рекорд кўрсаткичдир. Улардан саккизтасида ҳаво ҳарорати Цельсий бўйича 44 даражага етди.