Farg‘onada hibsxonada saqlangan mansabdorga tibbiy yordam ko‘rsatilmagani aytilgan xabarga munosabat bildirildi

Ijtimoiy tarmoqlarda fuqaro S.A. vaqtincha saqlash hibsxonasida saqlangani hamda Dang‘ara tumani prokuraturasida tergov o‘tkazilayotgan vaqtda unga tibbiy yordam ko‘rsatilmagani haqida xabarlar e’lon qilindi. Holat yuzasidan Farg‘ona viloyati prokuraturasi izoh berdi.

Aniqlanishicha, elektrga noqonuniy ulash ishlarini bajarish evaziga mansabdor shaxslar S.A. va M.A. fermer xo‘jaligi rahbaridan 29,2 million so‘m pul olib, fermer xo‘jaligining jami 132,2 million so‘mlik elektrdan noqonuniy foydalanishiga sharoit yaratib bergan.

Mazkur holat yuzasidan Dang‘ara tumani prokuraturasida o‘tkazilgan dastlabki tergov davomida S.A. 2022-yil 3-iyun kuni Jinoyat kodeksining 210-moddasi (pora olish) 2-qismi “v”, “g” bandlari, 185²-moddasi (elektr, issiqlik energiyasi, gaz, vodoprovoddan foydalanish qoidalarini buzish) 3-qismi bilan gumon qilinuvchi tariqasida jalb etilib, protsessual tartibida ushlangan va Qo‘qon shahri IIB vaqtincha saqlash hibsxonasiga joylashtirilgan. Jinoyat ishlari bo‘yicha Dang‘ara tumani sudining 4-iyundagi ajrimi bilan S.A.ga uy qamog‘i ehtiyot chorasi qo‘llangan.

S.A. va boshqalarga nisbatan bo‘lgan jinoyat ishi yuzasidan dastlabki tergov yakunlanib, 23-iyun kuni ayblov xulosasi bilan JIB Dang‘ara tuman sudiga yuborilgan. Tergovda S.A. belgilangan tartibda himoya huquqi bilan ta’minlangan, tergov jarayonida va vaqtincha saqlash hibsxonasida bo‘lgan vaqtda uning sog‘lig‘i holati yuzasidan biror-bir shikoyat yoki iltimosnoma kelib tushmagan.

Hozirgi kunda jinoyat ishi sudda ko‘rilmoqda. Aynan sud ishni ko‘rib chiqishi davomida bunday xabarlar tarqatilishi sud ishiga aralashish va ish jarayoniga ta’sir o‘tkazish deb baholaymiz. Shu o‘rinda ta’kidlash joizki, qonunchilikda tergov va sud ishlariga aralashish, ya’ni uning har tomonlama, to‘la va xolisona o‘tkazilishiga to‘sqinlik qilish maqsadida surishtiruvchi, tergovchi yoki prokurorga yoxud adolatsiz hukm chiqarilishiga erishish maqsadida sudyaga turli shaklda qonunga xilof ravishda ta’sir o‘tkazganlik uchun tegishli javobgarlik belgilangan, — deyiladi munosabatda.