Buxoro viloyati G‘ijduvon tumanidagi 3 ta maktab direktorlari rag‘batlantirish sifatida Dubayga sayohatga yuborildi. Bu haqda Xalq ta’limi vazirligi axborot xizmati xabar berdi.
Ta’kidlanishicha, tuman hokimining tashabbusi bilan xalq ta’limi tizimida yangicha yondashuvlar joriy etilib, o‘quvchi va o‘qituvchilarni rag‘batlantirish bo‘yicha tashabbuslar ilgari surilmoqda.
Xususan, tuman hokimligi tomonidan yil davomida “5 tashabbus olimpiadasi doirasi”, “Hokim olimpiadasi”, “Bir oyda ikkita kitob o‘qiyman” kabi ko‘rik tanlovlarda yuqori o‘rinlarni qo‘lga kiritgan direktorlar, jumladan, 13-maktab direktori Doston Rustamov, 14-maktab direktori Hotam Hasanov, 17-maktab direktori Hokima Idiyevaning Dubayga bepul sayohati tashkillashtirib berildi. Maktab direktorlari 8-avgustdan 14-avgustgacha Dubay shahriga sayohat qilib, O‘zbekistonga qaytdi.
“O‘qituvchi sha’nini naqadar ulug‘larga ko‘targaningiz uchun, bizga berilgan shu qadar e’tibor uchun sizga minnatdorchilik bildiraman”, — dedi Hokima Idiyeva.
Izoh (0)