O‘zbekistonlik va amerikalik mutaxassislar agrotexnikumlarni zamonaviy ta’lim muassasalariga aylantirish bo‘yicha tajriba almashmoqda. Bu haqda “Dunyo” axborot agentligi xabar berdi.
Ta’kidlanishicha, shu kunlarda O‘zbekiston Qishloq xo‘jaligi vazirligi xodimlari, Toshkent davlat agrar universiteti va Jizzax viloyatidagi G‘allaorol texnikumi rahbariyati vakillaridan iborat delegatsiya xizmat safari bilan Amerika Qo‘shma Shtatlarida bo‘lib turibdi.
“Agrotexnikumlarni zamonaviy ta’lim muassasalariga aylantirish” loyihasi doirasida tashkil etilgan ushbu safar davomida loyiha qatnashchilari Los-Anjeles shahridagi “Ridli Kollej” texnikumiga bordi. Uning direktori Jerri Bakli va direktor muovini Deyl van Dam bilan bo‘lib o‘tgan uchrashuvdan so‘ng mehmonlar texnikum hududida joylashgan 60 gektardagi zamonaviy chorvachilik xonalari, intensiv va an’anaviy bog‘lar, laboratoriyalar hamda amaliy mexanika yo‘nalishidagi jarayonlar bilan yaqindan tanishdi.
Uchrashuv doirasida ikki tomonlama o‘quv rejalari va ta’lim dasturlarini tuzish, pedagog xodimlar tajribasini oshirish bo‘yicha hamkorlik qilishga kelishib olinib, memorandum imzolandi.
O‘zbekiston delegatsiyasi a’zolari Los-Anjelesning eng yirik xususiy intensiv bog‘ida ham bo‘ldi. Ma’lum qilinishicha, XIX asrda tashkil etilgan ushbu bog‘da yetishtiriladigan uzum va shaftoli hozirgi paytda mahalliy va Yevropa bozorlarini ana shunday mevalar bilan ta’minlamoqda. Mezbonlar tomonidan bu kabi intensiv bog‘larni tashkil qilishning zamonaviy usullari, xususan, ekish va sug‘orish tizimlariga oid ko‘plab muhim ma’lumotlar taqdim etildi.
Izoh (0)