To‘raqo‘rg‘on IES qisqa fursatda ishga tushirilib, elektr energiyasini uzata boshlaydi — Energetika vazirligi

Namangan viloyatida joylashgan To‘raqo‘rg‘on issiqlik elektr stansiyasi faoliyati favqulodda to‘xtatilgani haqida xabar berilgandi. Energetika vazirligi matbuot xizmati magistral gaz quvurida yuzaga kelgan nosozlik maxsus brigada tomonidan bartaraf etilayotganini ma’lum qildi.

Qayd etilishicha, To‘raqo‘rg‘on issiqlik elektr stansiyasini tabiiy gaz bilan ta’minlovchi magistral gaz quvurida yuzaga kelgan nosozlik maxsus brigada tomonidan bartaraf etilmoqda. Mazkur ta’mirlash ishlari soat 18:00 ga qadar yakunlanishi ko‘zda tutilmoqda. Ta’mirlash ishlari yakunlangandan so‘ng To‘raqo‘rg‘on issiqlik elektr stansiyasi qisqa fursatda ishga tushirilib, elektr energiyasini uzata boshlaydi.

Hozirgi paytda yo‘qotilgan quvvatni tiklash uchun Toshkent, Yangi Angren, Sirdaryo IESlari hamda Chorvoq gidroelektr stansiyasidagi zaxira energobloklar ishga tushirilgan. Mazkur holat yuzasidan tergov harakatlari olib borilmoqda.

“Keltirilgan noqulayliklar uchun iste’molchilardan uzr so‘raymiz”, — deyiladi vazirlik xabarida.