Namangan viloyatining Kosonsoy tumanidagi “Yertikon” suv omborida bundan bir oy muqaddam suv sizishi kuzatilgan va bu mahalliy aholi orasida xavotirlarga sabab bo‘lgandi. “Daryo” muxbiri Azizbek Abduvaliyev mazkur inshootda bo‘lib, hozirgi holatni o‘rganib qaytdi.
“Yertikon” suv ombori 20 million kub suv saqlashga mo‘ljallangan bo‘lib, suv sizishi aniqlangan payt inshootda 3,6 million kub suv bo‘lgan. Shundan so‘ng bu yerga suv kiritish ishlari to‘xtatilgan, to‘plangan suv esa ekin maydonlarini sug‘orishga chiqarilgan. Ushbu choralardan so‘ng suv sizishi to‘xtagan.
“Bugungi kunga kelib ‘Yertikon‘da 420 ming kub suv qoldi, ya’ni suv sathi dastlabki holatiga qaytdi. Kelgusi haftadan suv sizgan joylarda yuqori bosim ostida sementlash ishlariga kirishiladi. Mutaxassislar muammo qolmagani haqida xulosa berganidan so‘ng suv omborimizga yana suv yig‘ish boshlanadi. Bir million kubga yetganida nazorat kuchaytiriladi: dispetcherlar, to‘g‘on muhandisi va o‘zim boshdan-oyoq ko‘zdan kechirib chiqamiz. Xavotirlanadigan holat bo‘lmasa, keyingi bosqichga o‘tamiz va shu tariqa loyihaviy quvvatga chiqamiz”, — deydi suv ombori boshlig‘i Zohidjon Ahmedov.
Zohidjon Ahmedovning qayd etishicha, suv ombori to‘la quvvat bilan ishlasa paxta, g‘alla maydonlari, bog‘lar va aholi tomorqalaridan iborat 2,5 ming gektar qishloq xo‘jaligi yerlarini suv bilan bemalol ta’minlash imkoniyati tug‘iladi.
Ma’lumot uchun, “Yertikon” suv ombori 1991-yilda foydalanishga topshirilgan va dastlab 12,4 million kub suv sig‘imiga mo‘ljallangan. Kosonsoy tumanida suv tanqisligini oldini olish maqsadida 2017-yili suv ombori sig‘imini 20 million kubga yetkazish bo‘yicha yangi loyiha tayyorlangan va 2017—2019-yillarda qurilish ishlari olib borilgan.
Mavzuga doir:
Izoh (0)