Xorazmda fuqaroga IIB xodimlari kuch ishlatgani aytilgan xabarga munosabat bildirildi

Xorazm viloyati Gurlan tumanida IIB xodimlari fuqaroga kuch ishlatgani, oqibatda jabrlanuvchi shifoxonaga yotqizilgani aytilgandi. Viloyat ichki ishlar boshqarmasi axborot xizmati holat yuzasidan munosabat bildirdi.

Ma’lum bo‘lishicha, 1988-yilda tug‘ilgan Sh.Yu. 11-avgust kuni ijtimoiy tarmoqlar orqali murojaat yo‘llab, unda Gurlan tumani IIB xodimlari uni asossiz tuman IIB binosida bir kecha saqlab, urib qiynagani, o‘zi hech qanday jinoyatga aloqador emasligini bildirib o‘tgan.

Gurlan tumani IIBga 4-avgust kuni tuman markazidagi kafe oldida to‘xtab turgan Captiva avtomashinasi salonida bo‘lgan bir guruh shaxslar giyohvandlik vositasi iste’mol qilayotgani to‘g‘risida ma’lumot kelib tushgan. Ushbu ma’lumotni tekshirib ko‘rish uchun tuman IIB tezkor xodimlari zudlik hodisa joyiga yetib borib, avtomashina saloni va u yerda bo‘lgan shaxslarning yonini ko‘zdan kechirganida avtomashina salonida giyohvandlik vositalarini iste’mol qilish uchun moslangan yelim idish va giyohvandlik vositasiga o‘xshovchi o‘tkir hidli modda borligi aniqlangan.

Shundan keyin holatga aniqlik kiritish uchun ushbu shaxslar tuman ichki ishlar bo‘limiga olib borilgan. Ushbu shaxslar orasida ijtimoiy tarmoqlar orqali murojaat yo‘llagan fuqaro Sh.Yu. ham bo‘lgan. U ilgari giyohvandlik vositalarini qonunga xilof ravishda o‘tkazish bilan bog‘liq jinoyat uchun sudlangan bo‘lib, tuman IIB probatsiya guruhi hisobida turishi bois ichki ishlar bo‘limi xodimlarini yaqindan tanigan.

Avtomashina salonida bo‘lgan besh nafar shaxs, jumladan, Sh.Yu. ham dastlab sud-tibbiy va sud-kimyoviy ekspertizasidan o‘tkazilgan. Avtomashinadan topilgan o‘tkir hidli modda sud-kimyoviy ekspertizasi xulosasiga ko‘ra gashish giyohvandlik vositasi ekani ma’lum bo‘lgan.

Shuni alohida ta’kidlab o‘tish lozimki, bugungi kunda ichki ishlar organlariga keltirilgan har bir shaxs belgilangan tartibda ro‘yxatga olinadi. Shu bilan birgalikda, ichki ishlar bo‘limi ma’muriy binosi, jumladan, so‘roq qilish xonalari kuzatuv kameralari bilan jihozlangan bo‘lib, so‘roq qilinuvchi shaxslarga nisbatan qiynoq qo‘llanilishiga yo‘l qo‘yilmaydi.

Bundan tashqari, ichki ishlar bo‘limida so‘roq qilingan shaxslarning kelgusida javobgarlikdan qutulib qolish maqsadida turli asossiz da’volar bilan murojaat qilishining oldini olish maqsadida ichki ishlar bo‘limida ushlab turilgan shaxslarni qo‘yib yuborish paytida tibbiy guvohlantirishdan o‘tkazish ham yo‘lga qo‘yilgan bo‘lib, mazkur holatda ushbu besh nafar shaxs vrach tomonidan tibbiy guvohlantirilganida ularda tan jarohati yo‘qligi qayd etilgan, — deyiladi munosabatda.