Namangandagi suv ombori to‘g‘oni ostidan suv sizib chiqqani aniqlandi
Ijtimoiy tarmoqlarda Namangandagi “Yertikon” suv ombori tashqi to‘g‘oni ostidan suv sizib chiqayotgani haqida xabarlar tarqaldi. Viloyat FVB holat yuzasidan birlamchi ma’lumot berdi.
Qayd etilishicha, 14-iyun kuni soat 10:35 da Namangan viloyati Favqulodda vaziyatlar boshqarmasi tezkor navbatchisidan olingan og‘zaki ma’lumotga ko‘ra, Kosonsoy tumani, Ququnboy qishlog‘ida joylashgan “Yertikon” suv omboridan suv sizib chiqishi (filtratsiya) kuzatilgan.
Yuqoridagi holatni bartaraf etish maqsadida suv omborida Namangan viloyati FVB hamda tegishli tashkilot mas’ul xodimlari bilan birgalikda o‘rganib chiqildi. “Yertikon” suv omborining 2 ta yerli joylaridan (5 va 10 litr sekundiga) suv sizib chiqishi 13-iyun kuni 19:00 lardan boshlangani, damba (temir beton)ning o‘zi mustahkamligi, aholiga va to‘g‘onga xavf yo‘qligi aniqlangan.
Suv sizib chiqishini bartaraf etish maqsadida “Kosonsoy” suv omboridan suvni chiqarish to‘xtatilgan, “Yertikon” suv omboridan suvni chiqarish Kalbuva va Musa ariq kanallari (avariyaviy tashlama) orqali 4 metr sekundgacha oshirilgan (suv omboridan suvni shu hajmda chiqarilishi natijasida 2 sutka mobaynida davom ettirilishi evaziga sizib chiqayotgan suv — filtratsiya joylari bartaraf etildi).
Qayd etilishicha, hozirda ushbu suv omborida vaziyatni kuzatib borish va ishlarni nazorat qilish maqsadida tegishli mutaxassislaridan iborat tun-u kun kuzatuv posti tashkil etildi.
