Qashqadaryo viloyatining Qarshi shahrida fuqarolar e’tiroziga sabab bo‘lgan noqonuniy qurilma buzib tashlandi. Bu haqda “Daryo”ga shahar hokimligi axborot xizmati rahbari Umid Jabborov xabar berdi.
“Daryo”ga Qarshi shahrida yashovchi aholi vakillaridan murojaat kelib tushdi. Unda shahardagi ko‘p qavatli uylar va fuqaro xonadoni yonida noqonuniy qurilma qilingani, bo‘sh turgan yer egallab olingani xabar berildi.
“Bu yer ko‘p qavatli uy yonidagi hudud edi. Ko‘p qavatli uyni qurishayotgan paytda bu yer yashil hudud bo‘lishi aytilgandi. Yashil hudud bo‘lmagan taqdirda ham bu yerdan nimadir qurilsa, domning oldidagi avtomobillar harakati cheklanib qoladi. Qolaversa, domda aholi yashaydi. Ularning ham bola-chaqasi bor. Chiqib o‘ynayman deydi. Bu nima bo‘ladi keyin”, — deydi aholi vakillari.
Yana bir fuqaro esa ko‘p qavatli uylar orasida qurilish qilish mantiqqa to‘g‘rik kelmasligini, yong‘in yuz bergan paytlarda ko‘p qavatli uy oldiga kirib-chiqish muammo bo‘lib qolishini aytmoqda.
“Mahalladagilardan so‘rasak, bu yer sotilgan deyishdi. Qanday sotiladi? Yer auksion orqali sotilmaydimi?”, — deydi yana bir fuqaro.
Tahririyat holat yuzasidan Qarshi shahar hokimligi axborot xizmatiga murojaat qilib, fuqarolar muammo yuzasidan shikoyat qilayotganini ma’lum qildi.
“Shahar arxitektori, kadastr bo‘limi boshlig‘i bilan voqea joyiga bordik. Holatdan norozi fuqarolar bilan ham muloqot qildik. Aholi qurilishni kim amalga oshirayotganini bilmas ekan. Surishtirib, voqeani o‘rgansak, qurilma noqonuniy ekan. Shu sabab noqonuniy qurilma buzib tashlandi”, — deydi Qarshi shahar hokimligi axborot xizmati rahbari Umid Jabborov.
Shahar hokimligi vakillarining aytishicha, fuqaro hech qanday hujjat qilmay, bo‘sh yerni egallab, atrofini o‘rab olgan.
“Holat haqida shahar qurilish bo‘limidan ma’lumot so‘ralgoanida ular ham vaziyatdan bexabar ekanini, mazkur qurilma hech qanday hujjatlarsiz qurilganini, yer o‘zboshimchalik bilan egallanganini aytishdi. Shu sabab bu harakatga chek qo‘yildi”, — deydi shahar hokimligi mas’uli.
Izoh (0)