Қашқадарё вилоятининг Қарши шаҳрида фуқаролар эътирозига сабаб бўлган ноқонуний қурилма бузиб ташланди. Бу ҳақда «Дарё»га шаҳар ҳокимлиги ахборот хизмати раҳбари Умид Жабборов хабар берди.
«Дарё»га Қарши шаҳрида яшовчи аҳоли вакилларидан мурожаат келиб тушди. Унда шаҳардаги кўп қаватли уйлар ва фуқаро хонадони ёнида ноқонуний қурилма қилингани, бўш турган ер эгаллаб олингани хабар берилди.
«Бу ер кўп қаватли уй ёнидаги ҳудуд эди. Кўп қаватли уйни қуришаётган пайтда бу ер яшил ҳудуд бўлиши айтилганди. Яшил ҳудуд бўлмаган тақдирда ҳам бу ердан нимадир қурилса, домнинг олдидаги автомобиллар ҳаракати чекланиб қолади. Қолаверса, домда аҳоли яшайди. Уларнинг ҳам бола-чақаси бор. Чиқиб ўйнайман дейди. Бу нима бўлади кейин», — дейди аҳоли вакиллари.
Яна бир фуқаро эса кўп қаватли уйлар орасида қурилиш қилиш мантиққа тўғрик келмаслигини, ёнғин юз берган пайтларда кўп қаватли уй олдига кириб-чиқиш муаммо бўлиб қолишини айтмоқда.
«Маҳалладагилардан сўрасак, бу ер сотилган дейишди. Қандай сотилади? Ер аукцион орқали сотилмайдими?», — дейди яна бир фуқаро.
Таҳририят ҳолат юзасидан Қарши шаҳар ҳокимлиги ахборот хизматига мурожаат қилиб, фуқаролар муаммо юзасидан шикоят қилаётганини маълум қилди.
«Шаҳар архитектори, кадастр бўлими бошлиғи билан воқеа жойига бордик. Ҳолатдан норози фуқаролар билан ҳам мулоқот қилдик. Аҳоли қурилишни ким амалга ошираётганини билмас экан. Суриштириб, воқеани ўргансак, қурилма ноқонуний экан. Шу сабаб ноқонуний қурилма бузиб ташланди», — дейди Қарши шаҳар ҳокимлиги ахборот хизмати раҳбари Умид Жабборов.
Шаҳар ҳокимлиги вакилларининг айтишича, фуқаро ҳеч қандай ҳужжат қилмай, бўш ерни эгаллаб, атрофини ўраб олган.
«Ҳолат ҳақида шаҳар қурилиш бўлимидан маълумот сўралгоанида улар ҳам вазиятдан бехабар эканини, мазкур қурилма ҳеч қандай ҳужжатларсиз қурилганини, ер ўзбошимчалик билан эгалланганини айтишди. Шу сабаб бу ҳаракатга чек қўйилди», — дейди шаҳар ҳокимлиги масъули.
Изоҳ (0)