Andijonda 2022-yilning o‘tgan olti oyi davomida qonunbuzilishlariga yo‘l qo‘ygan 2025 nafar shaxs intizomiy javobgarlikka tortilgan, yana olti nafar vakolatli shaxs bilan esa tuzilgan mehnat shartnomasi bekor qilingan. Bu haqda viloyat adliya boshqarmasi tomonidan o‘tkazilgan matbuot anjumanida ma’lum qilindi, deya xabar bermoqda “Daryo” muxbiri.
Boshqarma boshlig‘i Otabek Bozorovning ta’kidlashicha, boshqarma va uning quyi bo‘limlari tomonidan o‘tgan olti oy davomida belgilangan vazifalar asosida sohaviy yo‘nalishlar bo‘yicha bir qator samarali ishlar amalga oshirilgan.
Jumladan, olti oy davomida boshqarma va bo‘limlarga jami 5748 ta murojaat kelib tushgan bo‘lib, ularning 5294 tasi hal etilishiga erishilgan.
Qolgan murojaatlar bo‘yicha tegishligiga ko‘ra, boshqa idora va tashkilotlarga yuborilgan. Sohalar kesimida tahlil qilinganda murojaatlarning 4072 tasi inson huquqlarini himoya qilish, 323 tasi davlat xizmatlari ko‘rsatish, 917 tasi huquqni qo‘llash amaliyoti hamda 436 tasi boshqa sohalarga oidligi aniqlangan.
Qanoatlantirilgan murojaatlar asosida turli idoralarga 407 ta taqdimnoma, sudlarga summasi 12,8 milliard so‘mdan ortiq 1411 ta da’vo ariza va 68 ta ma’muriy javobgarlikka tortish yuzasidan takliflar kiritilgan.
“Joriy yilning boshidan shu kunga qadar jami 678 ta o‘rganish va monitoringlar o‘tkazilgan bo‘lib, o‘rganishlar davomida aniqlangan qonunbuzilish holatlarini bartaraf etish yuzasidan 3451 ta taqdimnoma kiritilgan.
Ushbu taqdimnomalar natijasida fuqarolarga 5 milliard 628 million so‘m miqdoridagi mablag‘lar qaytarilishiga, 194 ta hujjat ijrosi to‘xtatilishiga hamda 3614 ta hujjat bekor qilinishiga erishilgan.
Aniqlangan qonunbuzilish holatlariga yo‘l qo‘ygan 2025 nafar shaxs intizomiy javobgarlikka tortilgan bo‘lsa, olti nafar vakolatli shaxslar bilan tuzilgan mehnat shartnomalari bekor qilingan.
Shuningdek, xodimlar tomonidan viloyat bo‘yicha jami 536 ta ma’muriy huquqbuzarlik holati aniqlanib, 75 ta holatda to‘g‘ridan-to‘g‘ri ma’muriy bayonnoma rasmiylashtirilgan. 461 ta holatda vakolatli organlariga ma’muriy javobgarlikka tortish yuzasidan takliflar berilgan.
Mazkur takliflar natijasida 551 nafar shaxslar ma’muriy javobgarlikka tortilgan. Bundan tashqari bo‘limlar tomonidan turli tashkilotlarga qonunbuzilish holatlariga yo‘l qo‘ymaslik yuzasidan 3123 ta ogohnoma kiritilgan”, — deydi Otabek Bozorov.
Avvalroq Namanganda davlat xizmatlari ko‘rsatishda 6,5 mingdan ortiq qonunbuzilish holatlariga yo‘l qo‘yilgani haqida xabar berilgandi.
Izoh (0)