O‘zbekiston elchisi Ravshan Usmonov UCSI Group kompaniyalar guruhi asoschisi va raisi Dato Piter Ng bilan uchrashdi va Port-Dikson shahridagi UCSI Hospital ko‘p tarmoqli tibbiyot markaziga tashrif buyurdi, deb xabar bermoqda “Dunyo” axborot agentligi.
Dato Piter Ng O‘zbekistonda sog‘liqni saqlash, oliy va kasb-hunar ta’limi sohalarida amalga oshirilayotgan islohotlarni yuqori baholadi. UCSI guruhi rahbari 28-iyun—1-iyul kunlari O‘zbekistonga tashrifi yakunlari bo‘yicha Toshkent davlat iqtisodiyot universiteti rektori Qo‘ng‘ratbay Sharipov bilan muzokaralar o‘tkazganidan mamnunligini bildirdi. Shu yilning may oyida Kuala-Lumpurda imzolangan hamkorlik masalalari muhokama qilindi. 2022—2023-o‘quv yilida O‘zbekistondan yosh olimlarni UCSI universitetining doktorantura yo‘nalishida o‘qishga yuborish va O‘zbekiston universitetining bir guruh xodimlari uchun Malayziyadagi muntazam o‘quv seminarlarini tashkil etish bo‘yicha kelishuvga erishildi.
Ta’kidlanishicha, safar davomida Toshkent farmatsevtika instituti va G.V.Plexanov nomidagi Rossiya iqtisodiyot universitetining Toshkent filiali bilan ham qo‘shma ta’lim dasturlari va ilmiy loyihalarni ishlab chiqish, professor-o‘qituvchilar almashinuvini ko‘zda tutuvchi yangi hamkorlik memorandumlari imzolandi. Jumladan, oktabr oyida Malayziyada o‘zbek o‘qituvchilarining malakasini oshirish bo‘yicha treninglar va o‘quv seminarlarini tashkil etish, shuningdek, UCSI universitetining “Zamonaviy texnologiyalarni rivojlantirishning dolzarb muammolari va istiqbollari” xalqaro ilmiy-amaliy konferensiyasida ishtirok etishi rejalashtirilgan.
Toshkent shahrida UCSI universiteti filialini ochish hamda “franchayzing” modeli asosida kadrlar tayyorlash bo‘yicha ilg‘or akkreditatsiyadan o‘tgan o‘quv dasturlarini yo‘lga qo‘yish bo‘yicha hamkorlik qilish imkoniyatlari va shakllari muhokama qilindi.
Shifoxonaga tashrif chog‘ida shifokorlar malakasini oshirish bo‘yicha hamkorlikni yo‘lga qo‘yish, respublika davlat va xususiy tibbiyot muassasalari bilan ilg‘or tajriba almashish masalalari ko‘rib chiqildi.
Malayziya tomoni qisqa muddatli o‘quv mashg‘ulotlari, seminarlar va vebinarlar, jumladan, o‘zbekistonlik shifokorlar uchun operatsiyalarni jonli translyatsiya qilish, ilmiy-amaliy konferensiyalar va tibbiy ko‘rgazmalarda ishtirok etish, qo‘shma ilmiy-amaliy tadqiqotlar, onlayn va yuzma-yuz muloqotlar tashkil etishga tayyorligini bildirdi.
Izoh (0)