Andijon viloyatining Izboskan tumanida hokim yordamchisidan videosini internetda tarqatmaslik evaziga 300 dollar talab qilgan blogerga nisbatan jinoyat ishi qo‘zg‘atilgan. Bu haqda “Daryo” manbasi xabar berdi.
Ijtimoiy tarmoqlarda dastlab Izboskan tuman hokimi yordamchisi ish vaqtida oyog‘ini uzatib, fuqaro bilan bepisand munosabatda bo‘layotgani aks etgan video tarqalgandi. Shundan so‘ng blogerning hokim yordamchisidan videoni tarqatmaslik uchun 300 dollar pul so‘ragani eshitilgan audioyozuv tarqaldi. “Daryo” muxbiri voqeaga aniqlik kiritish maqsadida jurnalistik surishtiruv o‘tkazgandi.
Unda Izboskan tumani hokimi yordamchisi Hojimurod Umrzoqov 2021-yilning noyabr oyidan buyon hokim yordamchisi vazifasida ishlab kelishi, shu vaqt davomida bloger undan bir necha marotaba pul so‘rab murojaat qilgani va yordam berib kelganini bildirgandi. So‘nggi paytlarda esa blogerga moliyaviy ko‘mak berolmay qolgani, bloger xalqaro blogerlar kuniga biror narsa qilib berishini so‘ragani, hech narsa qilib berolmasligini bildirganini ma’lum qilgandi.
Bloger Muhammadyusuf Yo‘ldoshev esa o‘sha kuni haqiqatan ham “Menga 300 dollar ber. Sening videoyingni chiqarmayman”, degan fikrni bildirganini tan olib, bu gaplarni kinoya-hazilomuz tarzida gapirganini aytgan edi.
“Daryo” manbasiga ko‘ra, ushbu voqeadan so‘ng huquqni muhofaza qiluvchi organlar tomonidan o‘rganishlar olib borilgan. O‘rganishlar davomida bir qancha fuqarolardan bloger ustidan ariza yoki shikoyat bilan murojaat qilgan. Ularning murojaatiga asosan unga nisbatan jinoyat ishi qo‘zg‘atilgan. Hozirda tergov harakatlari olib borilmoqda.
Jinoyat ishi doirasida bloger Jinoyat kodeksining bir nechta moddasi bilan gumonlanuvchi tariqasida ishga jalb qilinib, sudning ajrimi bilan unga “qamoqqa olish” ehtiyot chorasi qo‘llanilgan.
“Daryo” muxbiri viloyat Ichki ishlar boshqarmasi hamda viloyat sudidan bloger ishi yuzasidan ma’lumot olishga uringan, biroq so‘roviga javob ololmagan.
Izoh (0)