Rossiya iqtisodiy integratsiyani rivojlantirish uchun oltita sobiq Sovet davlati tomonidan tuzilgan Yevrosiyo taraqqiyot bankidagi (YTB) asosiy ulushlaridan voz kechmoqchi. Bu haqda Bloomberg xabar bermoqda.
Bu qaror orqali Rossiya bankning sanksiyalarga duchor bo'lishi xavfini kamaytirishni rejalashtirmoqda.
Bugungi kunda nazorat paketi egasi bo‘lgan Rossiya bankning 66 foiz aksiyalariga egalik qiladi. Mamlakat Belarus bilan birgalikdagi ulushini yarmidan kamiga qisqartirishni xohlamoqda.
Rossiya va Belarusning ko‘plab davlat tomonidan qo'llab-quvvatlanadigan tashkilotlari AQSH va Yevropa Ittifoqining sanksiyalariga uchragan, ammo Yevrosiyo taraqqiyot banki hozircha nishonga olinmagan.
YTB matbuot xizmati Bloomberg’ga izoh berishdan bosh tortgan. Qozog‘iston va Rossiya moliya vazirliklari izoh so‘rovlariga javob bermagan.
Agar kelishuv amalga oshadigan bo‘lsa Rossiya bilan bojxona ittifoqining bir qismi bo‘lgan Qozog‘iston bankni nazorat qiluvchi aksiyadori bo‘lishi mumkin.
Hozirda Qozog‘iston YTBdagi 32,99 foiz ulushga ega, Belarus 1 foizga yaqin, qolgan qismi esa Tojikiston, Armaniston va Qirg‘izistonga tegishli.
O‘zbekistonning YTB aksiyadorlari bo‘lgan mamlakatlarga kirish jarayoni 2022-yilda yakunlanishi mumkin. Fevral oyida ham O‘zbekiston bank a’zoligiga tayyorlanayotgani haqida xabar berilgan edi.
Yevrosiyo taraqqiyot banki 2006-yil yanvar oyida Rossiya va Qozog‘iston tomonidan o‘z a’zolarining bozor iqtisodiyotini rivojlantirish, ularning barqaror iqtisodiy o‘sishi va o‘zaro savdo-iqtisodiy aloqalarini kengaytirish maqsadida tashkil etilgan xalqaro moliya tashkilotidir.
Ayni paytda bankning a’zolari Armaniston, Belarus, Qozog‘iston, Qirg‘iziston, Rossiya va Tojikiston hisoblanadi.
Izoh (0)