Yil boshidan buyon O‘zbekiston tovar-xom ashyo birjasida tuzilgan bitimlar hajmi 44,1 foizga o‘sdi. Bu haqda “Daryo”ga Iqtisodiy tadqiqotlar va islohotlar markazining matbuot xizmati xabar berdi.
Birjada savdo faolligining sezilarli o‘sishi Xorazm (69,3 foiz), Navoiy (60,1 foiz), Jizzax (56,4 foiz), Toshkent (48,1 foiz) viloyatlarida va Toshkent shahrida (62,5 foiz) kuzatildi.
Ushbu hududlarda tuzilgan bitimlar hajmining o‘sishi mineral o‘g‘itlar, texnik chigitlar, o‘simlik yog‘i, avtomobil benzini, qurilish va xo‘jalik materiallari, dizel yoqilg‘isi, bug‘doy uni, paxta tolasi, qora va rangli metallar, polietilen, etil spirti va boshqa mahsulotlar savdosining ko‘payishi hisobidan erishilgan.
Shu bilan birga, Sirdaryo viloyatida 1,6 foizga qisqarish kuzatildi.
Bu polipropilen, paxta tolasi, o‘simlik yog‘i, texnik chigitlar, qora va rangli metall, sement, shrot va sheluxa, omuxta yem, sovun mahsulotlari va texnik yog‘ savdosi bo‘yicha tuzilgan bitimlar soni va hajmining kamayishi bilan izohlanadi.
Tahlil qilinayotgan davrda 55 740 ta yangi xo‘jalik yurituvchi subyektlar tashkil etilib, ularning eng ko‘pi Samarqand (7 183), Qashqadaryo (5 593), Farg‘ona (5 099), Toshkent (4 107), Andijon (3 702) viloyatlarida va Toshkent shahrida (8 990) ro‘yxatga olingan.
Avvalroq tovar-xomashyo birjasi O‘zbekistonning xorijdagi elchixonalar bilan 5 ta yangi savdo maydonchalarini ochgani haqida xabar berilgandi.
Izoh (0)