Россия иқтисодий интеграцияни ривожлантириш учун олтита собиқ Совет давлати томонидан тузилган Евросиё тараққиёт банкидаги (ЙТБ) асосий улушларидан воз кечмоқчи. Бу ҳақда Bloomberg хабар бермоқда.
Бу қарор орқали Россия банкнинг санкцияларга дучор бўлиши хавфини камайтиришни режалаштирмоқда.
Бугунги кунда назорат пакети эгаси бўлган Россия банкнинг 66 фоиз акцияларига эгалик қилади. Мамлакат Беларусь билан биргаликдаги улушини ярмидан камига қисқартиришни хоҳламоқда.
Россия ва Беларуснинг кўплаб давлат томонидан қўллаб-қувватланадиган ташкилотлари АҚШ ва Европа Иттифоқининг санкцияларига учраган, аммо Евросиё тараққиёт банки ҳозирча нишонга олинмаган.
ЙТБ матбуот хизмати Bloomberg’га изоҳ беришдан бош тортган. Қозоғистон ва Россия молия вазирликлари изоҳ сўровларига жавоб бермаган.
Агар келишув амалга ошадиган бўлса Россия билан божхона иттифоқининг бир қисми бўлган Қозоғистон банкни назорат қилувчи акциядори бўлиши мумкин.
Ҳозирда Қозоғистон ЙТБдаги 32,99 фоиз улушга эга, Беларусь 1 фоизга яқин, қолган қисми эса Тожикистон, Арманистон ва Қирғизистонга тегишли.
Ўзбекистоннинг ЙТБ акциядорлари бўлган мамлакатларга кириш жараёни 2022 йилда якунланиши мумкин. Февраль ойида ҳам Ўзбекистон банк аъзолигига тайёрланаётгани ҳақида хабар берилган эди.
Евросиё тараққиёт банки 2006 йил январь ойида Россия ва Қозоғистон томонидан ўз аъзоларининг бозор иқтисодиётини ривожлантириш, уларнинг барқарор иқтисодий ўсиши ва ўзаро савдо-иқтисодий алоқаларини кенгайтириш мақсадида ташкил этилган халқаро молия ташкилотидир.
Айни пайтда банкнинг аъзолари Арманистон, Беларусь, Қозоғистон, Қирғизистон, Россия ва Тожикистон ҳисобланади.
Изоҳ (0)