3-avgust kuni Shavkat Mirziyoyevning tadbirkorlar bilan muloqotiga tayyorgarlikning borishi bo‘yicha yig‘ilish o‘tkazildi. Bu haqda Prezident matbuot xizmati xabar qildi.
Ma’lum qilinishicha, 2021-yil 20-avgust kuni davlat rahbari tadbirkorlar bilan ilk bor ochiq muloqot o‘tkazgan. Bu sana mamlakatda “Tadbirkorlar kuni” sifatida belgilanib, bunday uchrashuvlar an’anaviy tarzda, har yili tashkil etiladigan bo‘lgan.
Bu yilgi muloqotga tadbirkorlardan savol va takliflarni yig‘ish bo‘yicha respublika shtabi hamda Call-markaz tashkil etilgan. Unga bugungi kungacha 7 ming 200 dan ortiq taklif va murojaatlar kelib tushgan. Respublika shtabi a’zolari ularda ko‘tarilgan tizimli va xususiy masalalarni har kuni muhokama qilib bormoqda. Ularning aksariyati joyida hal etilmoqda.
Yig‘ilishda davlat rahbari sohadagi tizimli muammolarga alohida e’tibor qaratgan. Tahlillarga ko‘ra, xususiy mulk himoyasi, litsenziya va ruxsatnomalar olishdagi byurokratiya, tadbirkorlar uchun kredit, yer va bino ajratish, soliq ma’murchiligi hamda infratuzilma masalalari dolzarb bo‘lib turibdi. Yig‘ilishda bu muammolarning sabablari va ularni hal etish choralari muhokama qilingan.
Davlat rahbari har bir murojaatni, ayniqsa, kichik va o‘rta biznesni qiynayotgan masalalarni alohida nazoratga olib, qonuniy va ijobiy yechim topish zarurligini ta’kidlagan. Hududlarga chiqib, tadbirkorlarning muammo va takliflarini o‘rganish asosida biznes uchun sharoitlarni yaxshilash, tartib-taomillarni soddalashtirish bo‘yicha aniq ko‘rsatmalar bergan.
Avgust oyi o‘rtasidan boshlab, joylarda vazirlar va hokimlar ishtirokida tadbirkorlar bilan muloqot haftaligi o‘tkazilishi belgilangan. O‘zbekiston Respublikasi prezidenti ishtirokidagi uchrashuv bu haftalikning yakuniy va asosiy voqeasi bo‘ladi.
Izoh (0)