3 август куни Шавкат Мирзиёевнинг тадбиркорлар билан мулоқотига тайёргарликнинг бориши бўйича йиғилиш ўтказилди. Бу ҳақда Президент матбуот хизмати хабар қилди.
Маълум қилинишича, 2021 йил 20 август куни давлат раҳбари тадбиркорлар билан илк бор очиқ мулоқот ўтказган. Бу сана мамлакатда «Тадбиркорлар куни» сифатида белгиланиб, бундай учрашувлар анъанавий тарзда, ҳар йили ташкил этиладиган бўлган.
Бу йилги мулоқотга тадбиркорлардан савол ва таклифларни йиғиш бўйича республика штаби ҳамда Call-марказ ташкил этилган. Унга бугунги кунгача 7 минг 200 дан ортиқ таклиф ва мурожаатлар келиб тушган. Республика штаби аъзолари уларда кўтарилган тизимли ва хусусий масалаларни ҳар куни муҳокама қилиб бормоқда. Уларнинг аксарияти жойида ҳал этилмоқда.
Йиғилишда давлат раҳбари соҳадаги тизимли муаммоларга алоҳида эътибор қаратган. Таҳлилларга кўра, хусусий мулк ҳимояси, лицензия ва рухсатномалар олишдаги бюрократия, тадбиркорлар учун кредит, ер ва бино ажратиш, солиқ маъмурчилиги ҳамда инфратузилма масалалари долзарб бўлиб турибди. Йиғилишда бу муаммоларнинг сабаблари ва уларни ҳал этиш чоралари муҳокама қилинган.
Давлат раҳбари ҳар бир мурожаатни, айниқса, кичик ва ўрта бизнесни қийнаётган масалаларни алоҳида назоратга олиб, қонуний ва ижобий ечим топиш зарурлигини таъкидлаган. Ҳудудларга чиқиб, тадбиркорларнинг муаммо ва таклифларини ўрганиш асосида бизнес учун шароитларни яхшилаш, тартиб-таомилларни соддалаштириш бўйича аниқ кўрсатмалар берган.
Август ойи ўртасидан бошлаб, жойларда вазирлар ва ҳокимлар иштирокида тадбиркорлар билан мулоқот ҳафталиги ўтказилиши белгиланган. Ўзбекистон Республикаси президенти иштирокидаги учрашув бу ҳафталикнинг якуний ва асосий воқеаси бўлади.
Изоҳ (0)