Ukrainada Rossiya harbiy operatsiyasi boshlanganidan buyon birinchi don ortilgan kema Qora dengizdagi portdan 1-avgust kuni mahalliy vaqt bilan 8:30 da (Toshkent vaqti bilan 10:30 da) chiqadi. Bu haqda Turkiya Mudofaa vazirligi Twitter’da ma’lum qildi. Quruq yuk tashiydigan Razoni kemasi Syerra-Leone bayrog‘i ostida Livanga qarab yo‘l oladi.
Turkiya prezidenti matbuot kotibi Ibrohim Kalin avvalroq qishloq xo‘jalik mahsulotlari ortilgan kemalar Odessa portidan jo‘nab ketishga tayyorligini ma’lum qilgandi.
Ukraina va Rossiya BMT va Turkiya bilan alohida imzolagan bitimga muvofiq, Kiyev Odessa, Chernomorsk va Janubiy portlari orqali don chiqarib keta oladi. Ukraina infratuzilma vaziri o‘rinbosari Yuriy Vaskov avvalroq eksport Chernomorskdan boshlanishini, keyin esa Kiyev boshqa portlardan kemalarni yuborishga tayyor bo‘lishini aytgan edi. 29-iyul kuni mamlakat prezidenti Vladimir Zelenskiy turk kemasiga yuk ortilayotgan Chernomorsk portiga keldi.
Eksport haqidagi kelishuvlarga ko‘ra, dengiz orqali bug‘doy eksporti uchun xavfsiz yo‘lak yaratildi, yuk ortilishini Turkiya va BMT vakillari kuzatib boradi, kemalarni esa Qora dengizga kirish va chiqishda Anqara, Moskva, Kiyev va BMT vakillaridan iborat muvofiqlashtirish markazi tekshiradi. Rossiya mudofaa vaziri Sergey Shoygu qayd etishicha, bu bo‘sh kemalarda qurol olib o‘tilishini istisno qilish uchun zarurdir.
Rossiya tashqi ishlar vaziri Sergey Lavrov ma’lum qilishicha, BMT bosh kotibi Antoniu Guterrish xalqaro kelishuv doirasida Rossiyadan qishloq xo‘jalik mahsulotlari va oziq-ovqatga qarshi cheklovlar olib tashlanishiga ko‘maklashish majburiyatini zimmasiga olgan. Vazirlik Ukraina va Rossiyadan don eksporti bir vaqtda boshlanishiga umid bildirgandi.
Eksport uchun mo‘ljallangan don ortilgan kemalar Ukrainada jangovar harakatlar boshlanganidan keyin mamlakat dengiz portlarida qamalib qoldi. Ukraina hukumati va BMT kemalar yo‘lining to‘silib qolishida Rossiyani aybladi. Rossiya Mudofaa vazirligi esa kemalar Ukraina dengizga joylashtirgan minalar tufayli portlardan chiqa olmayotganini ta’kidlagandi.
Izoh (0)