Yevropa tashqi siyosat xizmati (EBC) rasmiy vakili Yevroittifoqning Bag‘dodda davom etayotgan norozilik namoyishlari va ularning kuchayishidan xavotirda ekanini ma’lum qildi.
“Biz zo‘ravonliklar davom etishining oldini olish uchun barcha tomonlarni vazminlik ko‘rsatishga chaqiramiz. Siyosiy kuchlar konstitutsiyaviy asosda konstruktiv siyosiy muloqot orqali muammolarni hal qilishi kerak”, — deyiladi EBC vakilining 31-iyul kuni Bryusselda chop etilgan kommyunikesida.
Hujjatda ta’kidlanishicha, “tinch namoyish o‘tkazish huquqi demokratiya uchun muhim bo‘lsa-da, qonunlar va davlat institutlari hurmat qilinishi lozim”.
Iroqning nufuzli shia imomi Muqtada as-Sadr tarafdorlari Iroqning yangi bosh vaziri tayinlanishiga qarshi norozilik bildirgan holda 30-iyul kuni, bir haftada ikkinchi marta Bag‘dodning “yashil hududi”dagi parlament binosiga bostirib kirgan — ushbu hududda Iroq davlat muassasalari va bir qator xorijlik elchixonalar joylashgan.
Bag‘doddagi norozilik namoyishlari 27-iyul kuni, amaldagi bosh vazir Mustafo al-Kazimiyning zudlik bilan tarqalish chaqirig‘iga qaramay, bir necha yuzlab namoyishchilar parlament binosiga bostirib kirganida boshlangan edi.
Ayni damda Iroqda 2021-yil oktabr oyida mamlakatda saylovlar o‘tkazilgandan beri eng yirik norozilik namoyishlari bo‘lib o‘tmoqda. Namoyishchilar Eron tomonidan qo‘llab-quvvatlanadigan shia partiyalari boshchiligidagi Muvofiqlashtiruvchi tuzilma blokidan Muhammad al-Sudaniy nomzodining bosh vazir lavozimiga ko‘rsatilishiga qarshi chiqmoqda.
Izoh (0)