Iroqda nufuzli shia imomi Muktada as-Sadrning mamlakat yangi bosh vaziri tayinlanishiga qarshi namoyishlar uyushtirayotgan tarafdorlari parlament binosini nazorat ostida ushlab turishda davom etmoqda, ular o‘tirgan holda ish tashlash o‘tkazdi, deb yozadi “Interfaks”.
Associated Press xabariga ko‘ra, 31-iyul, yakshanba kungi ish tashlash “siyosiy norozilikdan ko‘ra ko‘proq tantanani eslatgan” — namoyishchilar parlament binosi ichkarisida raqsga tushgan, ibodat qilgan va shiorlarni baralla aytgan. Ularning ba’zilari yerga ko‘rpa-to‘shak yozib uxlagan.
Namoyishchilar 30-iyul, shanba kuni bir hafta ichida ikkinchi marta parlament binosiga bostirib kirdi. Bino Bag‘dodning Yashil zona deb ataluvchi hududida Iroqning boshqa davlat muassasalari va bir qator xorijiy elchixonalar bilan yonma-yon joylashgan.
Bag‘doddagi aksiyalar 27-iyul, chorshanba kuni boshlangan, o‘shanda bir necha yuzlab namoyishchilar parlament binosiga bostirib kirgan, amaldagi bosh vazir Mustafo al-Kozimiyning zudlik bilan tarqalish da’vatlariga quloq solmagan edi.
Iroqda ayni paytda o‘tgan yil oktabridan buyon (o‘shanda saylovlar o‘tkazilgan) eng katta ko‘lamli aksiyalar bo‘lib o‘tmoqda. Namoyishchilar bosh vazir lavozimiga Eron tomonidan qo‘llab-quvvatlanuvchi shialar partiyalari rahbarlik qiluvchi “Koordinatsiya tuzilmasi” blokidan Muhammad as-Sudaniy nomzodi ilgari surilishiga qarshi chiqmoqda.
BMT bosh kotibi Antoniu Guterrish Iroqda davom etayotgan noroziliklarni “xavotir bilan” kuzatmoqda va barcha tomonlarni vaziyatni zudlik bilan yumshatish, zo‘ravonliklarning davom etishiga yo‘l qo‘ymaslik, tinch namoyishchilar va davlat muassasalarining himoyasini ta’minlashga chaqirmoqda.
Noroziliklar chog‘ida 120 dan ortiq kishi yaralangani aytilmoqda.
Izoh (0)