Украинада Россия ҳарбий операцияси бошланганидан буён биринчи дон ортилган кема Қора денгиздаги портдан 1 август куни маҳаллий вақт билан 8:30 да (Тошкент вақти билан 10:30 да) чиқади. Бу ҳақда Туркия Мудофаа вазирлиги Twitter’да маълум қилди. Қуруқ юк ташийдиган Разони кемаси Серра-Леоне байроғи остида Ливанга қараб йўл олади.
Туркия президенти матбуот котиби Иброҳим Калин аввалроқ қишлоқ хўжалик маҳсулотлари ортилган кемалар Одесса портидан жўнаб кетишга тайёрлигини маълум қилганди.
Украина ва Россия БМТ ва Туркия билан алоҳида имзолаган битимга мувофиқ, Киев Одесса, Черноморск ва Жанубий портлари орқали дон чиқариб кета олади. Украина инфратузилма вазири ўринбосари Юрий Васков аввалроқ экспорт Черноморскдан бошланишини, кейин эса Киев бошқа портлардан кемаларни юборишга тайёр бўлишини айтган эди. 29 июль куни мамлакат президенти Владимир Зеленский турк кемасига юк ортилаётган Черноморск портига келди.
Экспорт ҳақидаги келишувларга кўра, денгиз орқали буғдой экспорти учун хавфсиз йўлак яратилди, юк ортилишини Туркия ва БМТ вакиллари кузатиб боради, кемаларни эса Қора денгизга кириш ва чиқишда Анқара, Москва, Киев ва БМТ вакилларидан иборат мувофиқлаштириш маркази текширади. Россия мудофаа вазири Сергей Шойгу қайд этишича, бу бўш кемаларда қурол олиб ўтилишини истисно қилиш учун зарурдир.
Россия ташқи ишлар вазири Сергей Лавров маълум қилишича, БМТ бош котиби Антониу Гутерриш халқаро келишув доирасида Россиядан қишлоқ хўжалик маҳсулотлари ва озиқ-овқатга қарши чекловлар олиб ташланишига кўмаклашиш мажбуриятини зиммасига олган. Вазирлик Украина ва Россиядан дон экспорти бир вақтда бошланишига умид билдирганди.
Экспорт учун мўлжалланган дон ортилган кемалар Украинада жанговар ҳаракатлар бошланганидан кейин мамлакат денгиз портларида қамалиб қолди. Украина ҳукумати ва БМТ кемалар йўлининг тўсилиб қолишида Россияни айблади. Россия Мудофаа вазирлиги эса кемалар Украина денгизга жойлаштирган миналар туфайли портлардан чиқа олмаётганини таъкидлаганди.
Изоҳ (0)