Toshkent shahri, Sirdaryo va Samarqand viloyatlarida o‘qishga kiritib qo‘yish va o‘qishni ko‘chirib berish bilan bog‘liq firibgarlik holatlari fosh etildi. Bu haqda Iqtisodiy jinoyatlarga qarshi kurashish departamenti xabar qildi.
Bosh prokuratura huzuridagi departament hamda DXXning Chilonzor tumani bo‘limlari tomonidan tezkor tadbir o‘tkazilgan. Unda “R.C.” MCHJ ta’sischisi va rahbari S.K. fuqaro M.ni yuqori lavozimlarda ishlovchi tanishlari orqali 10 000 dollar evaziga Toshkent tibbiyot akademiyasiga o‘qishga kiritib qo‘yishga kelishib, shundan 5000 dollarni olgan vaqtida ashyoviy dalillar bilan ushlangan.
Shu kabi holat Sirdaryo viloyatida ham qayd etilgan. O‘tkazilgan tezkor tadbirda fuqaro O.U. boshqa bir fuqaro A.ni yuqori lavozimda ishlovchi tanishlari yordamida Guliston davlat universitetiga o‘qishga kiritib qo‘yishi evaziga 5000 dollar olgan vaqtida ashyoviy dalillar bilan ushlangan.
Departament hamda DXXning Samarqand viloyati boshqarmalari tomonidan o‘tkazilgan tezkor tadbirda esa Samarqand davlat chet tillari institutida tyutor vazifasida ishlovchi Sh.T. fuqaro F.ni 3500 dollar evaziga qo‘shni Qozog‘istondagi oliy ta’lim muassasasining 1-kursini tugatgani to‘g‘risi hujjat tayyorlab berish orqali o‘zi ishlayotgan institutning 2-kursiga o‘qishga kiritib qo‘yishga kelishib, oldindan 2000 dollarni olgan vaqtida ashyoviy dalillar bilan ushlangan.
Shuningdek, departamentning Yangihayot tuman bo‘limi tomonidan o‘tkazilgan tezkor tadbirda fuqaro J.S. boshqa bir fuqaro P.ni tanishlari yordamida Qozog‘istondagi universitetning 2-kursini tugatgani to‘g‘risida hujjatlarni tayyorlab berish orqali Toshkent shahridagi universitetlarning biriga 3-kursga kiritib qo‘yishni va’da qilib, evaziga oldindan kelishilgan 2500 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)