Тошкент шаҳри, Сирдарё ва Самарқанд вилоятларида ўқишга киритиб қўйиш ва ўқишни кўчириб бериш билан боғлиқ фирибгарлик ҳолатлари фош этилди. Бу ҳақда Иқтисодий жиноятларга қарши курашиш департаменти хабар қилди.
Бош прокуратура ҳузуридаги департамент ҳамда ДХХнинг Чилонзор тумани бўлимлари томонидан тезкор тадбир ўтказилган. Унда «Р.C.» МЧЖ таъсисчиси ва раҳбари С.К. фуқаро М.ни юқори лавозимларда ишловчи танишлари орқали 10 000 доллар эвазига Тошкент тиббиёт академиясига ўқишга киритиб қўйишга келишиб, шундан 5000 долларни олган вақтида ашёвий далиллар билан ушланган.
Шу каби ҳолат Сирдарё вилоятида ҳам қайд этилган. Ўтказилган тезкор тадбирда фуқаро О.У. бошқа бир фуқаро А.ни юқори лавозимда ишловчи танишлари ёрдамида Гулистон давлат университетига ўқишга киритиб қўйиши эвазига 5000 доллар олган вақтида ашёвий далиллар билан ушланган.
Департамент ҳамда ДХХнинг Самарқанд вилояти бошқармалари томонидан ўтказилган тезкор тадбирда эса Самарқанд давлат чет тиллари институтида тютор вазифасида ишловчи Ш.Т. фуқаро Ф.ни 3500 доллар эвазига қўшни Қозоғистондаги олий таълим муассасасининг 1-курсини тугатгани тўғриси ҳужжат тайёрлаб бериш орқали ўзи ишлаётган институтнинг 2-курсига ўқишга киритиб қўйишга келишиб, олдиндан 2000 долларни олган вақтида ашёвий далиллар билан ушланган.
Шунингдек, департаментнинг Янгиҳаёт туман бўлими томонидан ўтказилган тезкор тадбирда фуқаро Ж.С. бошқа бир фуқаро П.ни танишлари ёрдамида Қозоғистондаги университетнинг 2-курсини тугатгани тўғрисида ҳужжатларни тайёрлаб бериш орқали Тошкент шаҳридаги университетларнинг бирига 3-курсга киритиб қўйишни ваъда қилиб, эвазига олдиндан келишилган 2500 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)