Andijon shahar tibbiyot birlashmasining markaziy shifoxonasida murakkab transplantatsiya jarrohlik amaliyoti o‘tkazildi. Unda 60 yoshli erkak 33 yoshli qiziga, shuningdek, 37 yoshli ayol turmush o‘rtog‘iga donorlik qildi. Bu haqda “Daryo” muxbiri Umidjon Mamarasulov xabar bermoqda.
Viloyat sog‘liqni saqlash boshqarmasi axborot xizmati rahbari Mufazzalshoh Muhammadiyevning aniqlik kiritishicha, Andijon viloyatidagi sog‘lomlashtirish aksiyasida murakkab transplantatsiya operatsiyalari ham o‘tkazilgan.
“Surunkali buyrak yetishmovchiligi bilan kasallangan bemorlarning kun tartibi, hayot sifati boshqa bemorlarnikidan anchayin farq qiladi. Ularning aksariyati gemodializ muolajasini olib yurishga majbur. Aks holda kasallik zo‘rayib, bemor qiyin ahvolda qolishi hech gap emas. Joriy yilning aprel oyida Respublika ixtisoslashtirilgan xirurgiya ilmiy-amaliy tibbiyot markazi qon-tomir jarrohligi va buyrak transplantatsiyasi bo‘limi rahbari, tibbiyot fanlari doktori Fazliddin Bahritdinov boshchiligidagi brigada viloyatimizning malakali shifokorlari hamrohligida ikki bosqichli operatsiyani o‘tkazishgan edi. Unda 29 yoshli ukaning bir buyragi 37 yoshli bemor akasiga ko‘chirib o‘tkazildi. Aksiya doirasida ularning salomatligi yana bir qator tekshirilib, kerakli tavsiyalar berildi. Shundan so‘ng buyrak yetishmovchiligi bilan aziyat chekayotgan yana ikki nafar bemorda mana shunday operatsiyalar o‘tkazildi”, — deydi Mufazzalshoh Muhammadiyev.
Ta’kidlanishicha, Baliqchi tumanida yashovchi 33 yoshli Gulmira Bobomirzayeva ana shunday bemorlardan. Shifokorlar ko‘rigidan so‘ng, bemorning otasi, 60 yoshli Nasimjon Mahmudov o‘z jigarbandiga bir buyragini berishga qaror qilgan. Poytaxtdan kelgan yetakchi shifokorlar va mahalliy mutaxassislar ishtirokida otaning bir buyragi qiziga o‘tkazilgan. To‘rt soat davom etgan operatsiya esa muvaffaqiyatli yakunlanib, bemor yana hayotga qaytgan.
39 yoshli Akmal Zokirov ham 37 yoshli turmush o‘rtog‘ining donorligi evaziga sog‘lig‘ini tiklab olmoqda.
“Hayot turli sinovlardan iborat ekan. Ish va oila tashvishlari bilan bo‘lib, salomatligimga bee’tibor qolibman. Doimiy sport bilan shug‘ullanaman-ku deb ko‘nglim xotirjam edi. To‘g‘risi joriy yilning fevral oyigacha sog‘ligimda hech qanday salbiy holatlarni sezmagandim. O‘shanda sport mashg‘ulotlari payti edi. Nimadir bo‘lib hushimdan ketganimni bilaman o‘zimga kelganimda shifoxonada yotgandim. Shifokorlar zudlik bilan tibbiy tekshiruvlardan o‘tkazishdi. Achinarlisi menda o‘tkir burak yetishmovchiligi aniqlandi. Mana shundan keyin jiddiy davolanishni boshladim. Chuqur tekshirishlardan o‘tkazilgach, poytaxtlik shifokorlar buyrak transplantatsiyasi amaliyotini tavsiya qilishdi. Shunda turmush o‘rtog‘im Shohidaxon bir buyragini menga berishini aytdi. Buning uchun undan mingdan ming roziman”, — deydi 39 yoshli Akmal Zokirov.
Izoh (0)