Senatda “ayollar daftari”dagilarning uyini ta’mirlash ishlari 1 foizgina bajarilgani tanqid qilingani, mas’ul idora budjet va MIBdan mablag‘ o‘z vaqtida tushmaganini sabab qilib ko‘rsatgani haqida xabar berilgan edi. Majburiy ijro byurosi holat yuzasidan munosabat bildirib, jamg‘armalar uchun mablag‘lar o‘z vaqtida o‘tkazilgani, uning hisobvaraqlardagi aylanishi byuro nazoratida emasligini ma’lum qildi.
Ta’kidlanishicha, byuro organlari tomonidan ijro hujjatlari bo‘yicha fuqarolarning manfaatlari himoya qilinishi bilan birga, ijtimoiy himoyaga muhtoj fuqarolar, boquvchisini yo‘qotgan ayollar hamda ishsiz yoshlar masalalarini hal etish bo‘yicha manzilli ishlar olib borilmoqda.
Davlat rahbarining tegishli farmoni bilan ehtiyojmand fuqarolarni qo‘llab-quvvatlash uchun joriy etilgan “temir daftar”, “ayollar daftari” va “yoshlar daftari” jamg‘armalariga 2022-yilning 1-yarmida 271 milliard so‘m mablag‘ yo‘naltirilgan. Bu ko‘rsatkich 2021-yilning shu davriga nisbatan 46 milliard so‘m (20 foiz) ko‘p hisoblanadi.
Tadbir boshidan esa jami 812 milliard so‘mga yaqin mablag‘lar aynan ushbu jamg‘armalarga yo‘naltirilgan.
“Ushbu mablag‘lar Moliya vazirligi g‘aznachilik hisobvaraqalar orqali aylanadi, ularning qay tarzda jamg‘armalarga o‘tkazilishi byuro tomonidan nazorat qilinmaydi”, — deyiladi munosabatda.
Izoh (0)